Ministri i Jashtëm polak thërret për riarmatim afatgjatë të Evropës

Ministri i Jashtëm polak, Radoslaw Sikorski, ka thënë se një riarmatim afatgjatë i Evropës, në të cilin Britania e Madhe mund të luajë rolin më të afërt të mundshëm, është i nevojshëm për të mposhtur ambiciet perandorake ruse.

Në një intervistë për "The Guardian" të shtunën, Sikorski ka thënë se Polonia mbështet të drejtën e Ukrainës për të goditur objektivat ushtarake brenda Rusisë, duke argumentuar se perëndimi duhej të ndalonte së kufizuari vazhdimisht veten në atë që bën për të mbështetur Ukrainën. 

Sikorski, i shkolluar në Universitetin e Oksfordit së bashku me David Cameron, ishte në Londër për një takim dypalësh me sekretarin e Jashtëm. Sikorski ka qenë një figurë kritike në kthimin e Polonisë në rrymën kryesore të politikës së jashtme evropiane, që kur zgjedhjet tetorin e kaluar çuan në një qeveri të re koalicioni dhe një fund të sundimit tetëvjeçar nga partia nacionaliste e djathtë “Ligj dhe Drejtësi”.

Ai sapo kishte ardhur nga një takim në Berlin me ministrat e Jashtëm të Francës dhe Gjermanisë, në të ashtuquajturin formatin e trekëndëshit të Vajmarit, një grupim që tani shihet si fuqia e re politike e BE-së.

Edhe pse ai tha se Rusia po korrte fitore të vogla në Ukrainë, grupi i Vajmarit mbështeti një përpjekje për të mbushur boshllëqet e mëdha në aftësitë mbrojtëse të BE-së, të formuara në fund të Luftës së Ftohtë.

“Është e qartë se Evropa ka mbetur prapa dhe mbrojtja dhe baza teknologjike dhe industriale e BE-së vuan nga mosinvestimet për vite me radhë”, ka deklaruar Sikorski. 

Ai pranoi se prodhuesit evropianë të mbrojtjes ende nuk e ndiejnë se procesi i riarmatimit ishte i përhershëm teksa ka shtuar se presidenti rus, Vladimir Putin po shpenzon 40% të PBB-së për mbrojtjen, duke deklaruar se ai do ta falimentonte vendin e tij duke e bërë ushtrinë të uritur për burime. 

"Evropa jo vetëm që u çarmatos , por u deindustrializua në fushën e mbrojtjes”, ka deklaruar Sikorski.