Një konflikt diplomatik ka shpërthyer të hënën mbrëma mes Greqisë dhe Britanisë së Madhe, pasi Britania e Madhe ka anuluar një takim të planifikuar të kryeministrave të dy vendeve, duke bërë që kryeministri grek të akuzonte homologun e tij britanik se po përpiqej të shmangte diskutimin mbi kthimin e skulpturave të Tempullit të Partenonit.
Kryeministri grek Kyriakos Mitsotakis pritej të takohej me kryeministrin britanik Rishi Sunak, por takimi i tyre është anuluar në momentin e fundit nga pala britanike. Në këtë takim pritej paraqitja e kërkesës së Greqisë, për kthimin e skulpturave antike nga Muzeu Britanik. Britania e Madhe e ka konfirmuar se dy udhëheqësit nuk do të takohen dhe se Mitsotakis do të zhvillojë bisedime me zëvendëskryeministrin, Oliver Dowden.
Athina ka kërkuar prej kohësh kthimin e skulpturave që u morën nga Greqia nga diplomati britanik Lord Elgin në fillim të shekullit të 19-të. Skulpturat, të cilat i përkisnin tempullit 2500-vjeçar të Partenonit në Akropol, janë ekspozuar në Muzeun Britanik në Londër prej më shumë se dy shekujsh.
Muzeu Britanik e ka të ndaluar me ligj që t’i kthejë skulpturat në Greqi, por drejtuesit e tij kanë zhvilluar bisedime me zyrtarët grekë për një kompromis, siç është një hua afatgjatë.
Por zëdhënësi i Sunakut ka mbajtur një qëndrim të ashpër të hënën, duke thënë se qeveria e Britanisë së Madhe nuk e ka në plan që të ndryshojë qasjen dhe se Muzeu Britanik është vendi i duhur për skulpturat.
“Këto janë blerë ligjërisht në atë kohë, ato janë pronësi e ligjshme e muzeut. Nuk ka asnjë plan për të ndryshuar ligjin që e rregullon atë”, ka thënë zëdhënësi i kryeministrit britanik, Max Blain.
