Qindra grekë protestojnë kundër pagave të ulëta

Qindra grekë janë mbledhur në qendër të Athinës të martën teksa mjekë dhe mësues iu bashkuan punonjësve të sektorit publik të cilët bojkotuan punën në shenjë proteste kundër pagave të ulëta dhe krizës së kostos së jetesës.

Protestat po mbahen pak para votimit për buxhetin e vitit 2026.

Greqia është rikuperuar nga kriza e borxhit 2009-2018 pasi uli pagat si pjesë e një nisme shtrënguese në këmbim të tri paketave ndërkombëtare të shpëtimit. Pavarësisht rritjeve të shumta në vitet e fundit, pagat ende mbeten pas mesatares së eurozonës, ndërsa kostot e ushqimit dhe strehimit janë rritur.

Qeveria e qendrës së djathtë e Kyriakos Mitsotakis ka njoftuar lehtësime tatimore mbi të ardhurat dhe ndihma të tjera me vlerë 1.6 miliardë euro që parlamenti pritej t'i miratonte të martën si pjesë e buxhetit të vitit të ardhshëm.

Por punonjësit e bashkisë, mësuesit e shkollave dhe mjekët e spitaleve shtetërore kanë bojkotuar punën të martën për t'u bashkuar me një grevë 24-orëshe të sektorit publik për pagat, për të cilat ata thonë se nuk janë të mjaftueshme për ta kaluar muajin, raporton Reuters.

“Është një buxhet që shkurton miliona nga spitalet publike, ku punoj edhe unë, dhe i kanalizon paratë në shpenzime ushtarake”, ka thënë Argyria Rotokritou, një mjeke, e cila iu bashkua protestave jashtë parlamentit në kryeqytetin grek.

Protestuesit shprehën gjithashtu solidaritet me fermerët të cilët kanë vendosur mijëra traktorë dhe kamionë në dhjetëra bllokada për javën e tretë me radhë, duke ndërprerë trafikun përgjatë autostradave kryesore dhe duke bllokuar herë pas here kalimet kufitare për të protestuar ndaj vonesave në ndihmën e Bashkimit Evropian dhe pagesave të tjera.

Vonesat u shkaktuan nga hetimet në një rast ku disa fermerë, të ndihmuar nga punonjës shtetërorë, falsifikuan pronësinë e tokës për t'u kualifikuar për pagesa. Auditimet e vazhdueshme kanë ngadalësuar pagesat pasuese.

Fermerët kanë refuzuar një thirrje nga qeveria për bisedime, duke u kërkuar atyre të përshpejtojnë pagesën e ndihmës së vonuar bujqësore të BE-së, të ulin koston e karburantit bujqësor dhe t'i mbrojnë ata nga importet e produkteve.

Blegtorët gjithashtu kërkuan vaksinim të shpejtë të bagëtive të tyre pas një shpërthimi të lisë së deleve që çoi në ngordhjen e qindra mijëra deleve dhe dhive.

Disa industri, shitës me pakicë dhe biznese turistike kanë ngritur shqetësime në lidhje me ndikimin e bllokadave të fermerëve në udhëtime dhe transportin e mallrave gjatë sezonit të festave të Krishtlindjeve.