Rusia e ka ndërprerë furnizimin e saj me gaz në Finlandë, duke shënuar përshkallëzimin e fundit të një mosmarrëveshjeje për pagesat e energjisë me Perëndimin.
Gjiganti rus i gazit Gazprom kishte paralajmëruar se do të ndërpresë furnizimin mëngjesin e së shtunës, njofton BBC të shtunën.
Finlanda më vonë konfirmoi se të gjitha dërgesat ishin ndalur, por tha se nuk do të kishte asnjë ndërprerje për klientët.
Helsinki ka refuzuar të paguajë për furnizimet e tij në rubla. Por ndërprerja vjen gjithashtu pas një njoftimi se Finlanda do të aplikojë për anëtarësim në NATO.
Pavarësisht pushtimit të Ukrainës më 24 shkurt, Rusia vazhdon të furnizojë me gaz shumë vende evropiane.
Pasi fuqitë perëndimore sanksionuan Rusinë për shkak të luftës, Rusia tha se vendet "jomiqësore" duhet të paguajnë për gazin duke përdorur monedhën ruse, një lëvizje që BE-ja e konsideron shantazh.
Mbështetja në energjinë ruse është një faktor kontribues në krizën e kostos së jetesës me të cilën përballen shumë konsumatorë.
Finlanda importon shumicën e gazit të saj nga Rusia, por gazi përbën më pak se një të dhjetën e konsumit të energjisë në vend.
Të shtunën, kompania shtetërore finlandeze Gasgrid Finland tha në një deklaratë se furnizimet me gaz përmes pikës hyrëse të Imatra u ndaluan më 21 maj.
