Forcat ruse kanë bërë tërheqjen e plotë nga rrethina e kryeqytetit ukrainas, Kiev dhe besohet se janë duke rifurnizuar trupat për një rishpërndarje të pritshme në vend, ka thënë të mërkurën një zyrtar i lartë amerikan, raporton Sky News.

"Ne po vlerësojmë që të gjithë rusët janë larguar”, ka thënë zyrtari, duke folur në kushte anonimiteti.

Vlerësimi i SHBA-së, i cili u bë në 24 orët e fundit, vjen pasi këshilli i qytetit të Kievit kishte bërë të ditur se katër fëmijë ishin në mesin e 89 të vrarëve në kryeqytetin ukrainas që kur Rusia filloi pushtimin e saj, më 24 shkurt.

Ndërkohë, 398 persona të tjerë janë plagosur dhe 167 ndërtesa banimi janë dëmtuar nga sulmet ruse.

Këshilli i qytetit ka thënë se kryeqyteti ishte tani "më i sigurt", por ekzistonte ende një kërcënim për sulme ajrore nga armë me rreze më të gjatë.