Protestues të zemëruar iu kthyen rrugëve të kryeqytetit të Libanit të martën, duke bllokuar rrugët me djegie të gomave dhe kontejnerëve të mbeturinave ndërsa kriza financiare thellohet.
Protestat rifilluan – edhe pse në numër më të vogël – pas disa ditë qetësie ndërsa funta libaneze vazhdoi të binte.
“Ku janë njerëzit? Zbrit, jemi të uritur!”, bërtiti Ahmad Shuman, një protestues i cili ishte i zemëruar për shkak të numrit të vogël të njerëzve që kishin dalë në demonstrata, shkruan AP.
Valuta e Libanit ka humbur 90 për qind të vlerës së saj që nga tetori 2019, kur shpërthyer protestat anti-qeveritare, përfshirë mbi 25 për qind vetëm në javët e fundit. Politikanët e rinj kanë refuzuar të punojnë bashkë për të formuar qeverinë e re që do të implementonte reforma që do ta nxirrnin vendin nga krizat.
Kriza po paraqet kërcënimin më të madh për stabilitetin e Libanit që nga lufta civile në vitet 1975-90. Ministri i Jashtëm i Francës kishte paralajmëruar javën e kaluar se Libani po humb kohë para se të përjetojë kolaps total, duke vënë fajin tek liderët e vendit, refuzimi i të cilëve për t’u bërë bashkë për të formuar qeverinë ka zgjeruar krizën.
Qeveria libaneze ka dhënë dorëheqje në gusht pas shpërthimit masiv në portin e Bejrutit që la të vrarë 211 njerëz, të lënduar mbi 6,000 dhe duke dëmtuar lagje të tëra në kryeqytet.
