Botë

Grenelli u qepet bisedimeve për ndryshimin e pushtetit në Venezuelë

Foto: AP

Richard Grenelli, aleat i afërt i presidentit Donald Trump, që ka mbajtur një sërë postesh në administratën e tij, ka filluar tinëz një mision parazgjedhor muajin e shkuar, synim i të cilit së paku pjesërisht ishte që ta bindte presidentin venezuelas, Nicolas Maduro, të hiqte dorë nga pushteti.

Grenelli, si një mbështetës i zëshëm dhe energjik i fushatës së Trumpit për rizgjedhje, u takua më 17 shkurt, diku afër Mexico Cityt, me Jorge Rodriguezin, ish-nënpresidentin venezuelas dhe aleatin e ngushtë të Maduros, me qëllim që ta lehtësojë transicionin paqësor të pushtetit, ka bërë të ditur një zyrtar i Shtëpisë së Bardhë, duke folur për të përditshmen “New York Times”.

Sikur Maduroja të pajtohej që të largohej nga posti, kjo do të ishte fitorja madhore e Trumpit në rrafshin e politikave të jashtme, vetëm pak javë para zgjedhjeve. Por nuk ka dëshmi se rrugëtimi i Grenellit ka pasur ndonjë efekt dhe nuk është as e qartë pse Maduroja, një socialist që qeverisë me grusht të çeliktë e që ka mbajtur pushtetin pavarësisht kundërshtimit ndërkombëtar, do ta shqyrtonte krejt papritur dorëheqjen e tij.

Rrugëtimi i befasishëm

Udhëtimi, i cili ishte raportuar në “Bloomberg News” të mërkurën mbrëma, ka zënë të papërgatitur Departamentin Amerikan të Shtetit ama edhe disa prej zyrtarëve të vetë Shtëpisë së Bardhë, teksa ka krijuar konfuzion rreth qëllimit.

Një person i përfshirë në planifikimin e udhëtimit ka thënë se synimi ishte që të paktën pjesërisht të negociohet për lirimin e të burgosurve amerikanë në Venezuelë, por zyrtari i Shtëpisë së Bardhë dhe Grenelli e hodhën poshtë këtë mundësi. Në kuadër të politikave aktuale amerikane, zyrtarët mund të negociojnë vetëm me Maduron apo besnikët e tij për diskutimin e kushteve të largimit të tij.

Trumpi kishte kërkuar vitin e shkuar që Maduroja të jepte dorëheqje dhe Shtetet e Bashkuara e kishin njohur zyrtarisht Juan Guaidon, ish-kryetarin e Parlamentit që e udhëheq lëvizjen popullore opozitare të vendit, për president legjitim të Venezuelës.

Qëndrimi i Trumpit, i cili i priu dënimit të gjithëmbarshëm të Maduros nga komuniteti ndërkombëtar, i përfitoi atij mbështetje midis amerikanëve me qëndrime të serta, përfshirë mes votuesve latinë në Florida që janë vendimtarë për rezultatin përfundimtar të këtij shteti të rëndësishëm elektoral.

Por, njerëzit e afërt me Trumpin i vënë në pikëpyetje komentet e tija për ndryshimin e udhëheqjes; ish-këshilltari i tij për Siguri Kombëtare, John R. Bolton, ka shkruar në librin e botuar gjatë këtij viti se Trumpi ishte i impresionuar nga vendosmëria e Maduros, i cili e ruajti mbështetjen e ushtrisë.

Trumpi ishte, po ashtu, dyshues për sa i përket Guidos, ka shkruar Boltoni, duke e quajtur liderin e opozitës si “të dobët” dhe duke iu referuar si “Beto O’Rourke i Venezuelës” – një aludim ky te kongresisti i dikurshëm i Teksasit, përpjekja e pasuksesshme e të cilit për nominimin presidencial të Partisë Demokratike më 2020 nuk i kishte jetësuar pritshmëritë e larta të disave në subjektin e tij politik.

Në korrik, Trumpi udhëtoi në Florida për ta rishpalosur kundërshtimin e tij për Maduron dhe qeveritë e tjera socialiste në Amerikën Latine. Ai e akuzoi rivalin e tij demokrat, ish-nënpresidentin Joe Biden, për mbështetje “të politikave pro komunizmit” përreth Amerikës Latine, në atë që është parë si përpjekje për ta gjallëruar mbështetjen e lëkundur mes latinëve të shtetit.