Kryeministrja e Zelandës së Re, Jacinda Ardern e ka paralajmëruar të hënën formimin e një komisioni mbretëror, një formë e fuqishme e hetimit publik, rreth ngjarjeve që rezultuan me sulmin e 15 marsit mbi dy xhami në Christchurch, që kanë pesëdhjetë të vrarë.
“Është me rëndësi që tw përimtësohet gjithçka, për ta kuptuar deri në themel se si ka ndodhur ky akt i terrorizmit dhe nëse kishim apo cilat ishin mundësitë tona për ta ndalur atë”, u ka thënë Ardern gazetarëve në parlamentin në Wellington, raporton “Reuters”, transmeton “Koha Ditore”.
Një supermacist i të bardhëve është akuzuar me një pikë të vrasjes rreth sulmeve terroriste në Christchurch dhe seanca e radhës ndaj tij është caktuar më 5 prill.
Ardern ka thënë se fokus i hetimeve do të jetë nëse agjencitë e sigurisë kishin qenë të përqendruara në çështjet e duhura dhe nëse ka pasur gjurmë që është dashur të ndiqen, por se nuk është bërë një gjë e tillë.
Hetimet po ashtu do të trajtojnë rolin e medieve sociale dhe mënyrën se si i dyshimti e siguroi armën, ka thënë kryeministrja.
