Sigal Prishtina e Peja luajnë ndeshje vendimtare për vend në gjysmëfinale të Kupës së Kosovës në basketboll. Çerekfinalja e dytë e dy prej skuadrave kryesore në vend zhvillohet të mërkurën nga ora 19:00, në Pallatin e Rinisë dhe Sportit në Prishtinë.
Prej këtij edicioni çerekfinalja, por edhe gjysmëfinalja e Kupës zhvillohet në dy ndeshje. Deri më tani i gjithë turneu i Kupës është zhvilluar në një vend, brenda një jave.
Ndeshja e parë çerekfinale mes Pejës dhe Prishtinës ishte dramatike. Në fund, të mërkurën e kaluar, fitoi Peja me rezultat 74:71. Rezultati i ngushtë i ndeshjes së parë e lë plotësisht të hapur sfidën. Prishtinës i duhet fitorja me katër apo më shumë pikë dallimi për kualifikim. Nëse Prishtina fiton me tri pikë dallim, atëherë luhet vazhdimi prej pesë minutash.
Ndeshja sërish pritet të jetë e hapur dhe e fortë.
Në Superligë dy skuadrat me nam nuk janë në momentin më të mirë. Prishtina është e katërta me bilanc prej gjashtë fitoresh e katër humbjesh. Ka një ndeshje më pak të luajtur. Peja është e pesta me pesë fitore e gjashtë humbje.
Edhe
Ndeshje interesante në gjysmëfinale të Kupës së Kosovës
Në fundjavë asnjëra prej këtyre dy skuadrave nuk shfaqi formë të kënaqshme. Prishtina humbi në shtëpi nga Trepça me rezultat 81:68. Ndërkohë Peja u mposht në Suharekë nga Golden Eagle Ylli me rezultatin 92:84. Madje gjithë ndeshjen suharekasit kanë mbajtur epërsi shumë më të lartë.
Derisa gara për titull është larg përfundimit, Kupa është rrugë më e shkurtër për te trofeu. Dhe këtë rrugë synojnë ta bëjnë deri në fund si Prishtina ashtu edhe Peja. Por, vetëm njëra vazhdon pas të mërkurës mbrëma.
Në çerekfinalet e tjera pritet të ketë më pak realitet.
Të mërkurën prej orës 19:00 takohen edhe Trepça e Proton Cable Prizreni. Trepça ka fituar në qytetin e vjetër me rezultat 91:73 dhe nuk pritet të ketë telashe për kualifikim në gjysmëfinale.
Të enjten, nga ora 19:00, janë ndeshjet Bashkimi – Bora e Golden Eagle Ylli – Vëllaznimi.
Edhe
Sistem i ri në garën për Kupë, Peja apo Prishtina mbesin jashtë gjysmëfinales
Bashkimi e ka mposhtur Borën në Prishtinë me rezultat bindës, 88:66, në çerekfinalen e parë. Por në fundjavë prizrenasit sërish ishin në Prishtinë dhe humbën nga Bora në kuadër të Superligës.
Ndeshjen e parë mes Vëllaznimit dhe Yllit e fitoi ekipi gjakovar, 100:82. Por Ylli do ta synojë kthimin e madh në rezultat para tifozëve të tij.
