GO+ Peja ka regjistruar fitore bindëse të dielën ndaj Golden Eagle Yllit.
Pas disfatës që e pësoi nga Trepça në xhiron e kaluar, pejanët fituan thellë, 82:63, në “Karagaçi” ndaj skuadrës suharekase, që ishte vendëse.
Ndeshja e zhvilluar të dielën ishte e fundit e xhiros së nëntë në Superligën e Kosovës në basketboll.
Vetëm fillimi i ndeshjes ishte i mirë për Yllin. Më pas Peja e mori kontrollin dhe nuk lejoi befasi.
Në pjesën e parë pejanët krijuan epërsi prej shtatë pikëve, 44:37.
Me rezultatin 16:14, ekipi pejan e fitoi çerekun e tretë, ndërsa deri në fund të ndeshjes vetëm e rrit epërsinë.
Peja tani ka shtatë fitore e dy disfata sa edhe Bashkimi, derisa Ylli e pësoi disfatën e shtatë. Mbetet me vetëm dy fitore.
Më i miri te “verdhezinjtë” ishte Tajh Green me dyshifror të dyfishtë prej 15 pikëve, 17 kërcimeve e një asistimi.
Jordan Johnson kontribuoi me 16 pikë, gjashtë asistime e tri kërcime. Musab Mala pati 16 pikë, ndërsa Arti Hajdari i shtoi 10 të tjera.
Kapiteni Dardan Berisha e mbylli ndeshjen me nëntë pikë.
Trevon Allen ishte më i dalluari te Golden Eagle Ylli me 20 pikë, pesë kërcime e dy asistime.