Çmimi i lojtarit më të mirë të javës së pestë të Superligës së Kosovës në basketboll i ka takuar Cesare Edwardsit të GO+Pejës, ka njoftuar të martën Federata e Basketbollit e Kosovës.
Për amerikanin Edwards kjo është hera e dytë këtë edicion që e fiton çmimin e lojtarit më të mirë të xhiros. Ai ishte më i miri te Peja, që të dielën e fitoi derbin ndaj Sigal Prishtinës me rezultatin 95:90.
Edwards kishte 21 pikë, dhjetë kërcime dhe tri asistime. Ka zënë vend edhe në pesëshen më të mirë të xhiros.
Pjesë e pesëshes më të mirë janë edhe Tajh Green i Pejës, Kentrell Pullian i Rahovecit 029 dhe Dequon Lake e Kyan Anderson të Bashkimit.