Agjencia për Menaxhimin Emergjent ka njoftuar se zjarri i përhapur në parkun nacional të Prevallës ende nuk është lokalizuar, por se nuk ka rrezik për jetë dhe pasuri të banorëve të zonës.
Sipas një njoftimi në uebfaqen e Ministrisë së Punëve të Brendshme, në operacionet për fikjen e zjarrit nga toka pos zjarrfikësve dhe shpëtuesve nga Prizreni janë përfshirë edhe ata nga Gjakova, Prishtina e Ferizaj.
“Gjithashtu MPB/AME ju njofton se rrezik për jetë dhe pasuri të banorëve në Prevallë nuk ka, deri sa përpjekjet për ta mbajtur nën kontroll dhe të lokalizuar zjarrin vazhdojnë nga kapacitetet e komunës së Prizrenit me Komunat në ndihmë”, thuhet në njoftim.
Ndërkaq, kryetari i Prizrenit, Shaqir Totaj, pas takimit me shtabin emergjent ka thënë se situata është nën kontroll e se rreziku është më i vogël.
“Meqenëse kemi të bëjmë me Park Nacional, nënkuptohet se edhe institucionet e nivelit kombëtar, por edhe ndërkombëtar si KFOR-i, kanë obligime dhe shtabi është në koordinim të plotë me të gjithë akterët e autorizuar që po merren me këtë çështje, derisa gjendja po monitorohet dhe nuk pritet eskalim”, thuhet në një njoftim nga kabineti i Totajt.
Sipas njoftimit sot planifikohet intervenim dhe lokalizim i zjarrit për ta pasur nën kontroll dhe për t’i minimizuar pasojat eventuale.
Të pranishëm në operacion janë edhe Policia e Kosovës, pjesëtarë të parkut nacional e shërbimi emergjent mjekësor nga Prizreni.
Zjarri në bjeshkët e Prevallës ka nisur orët e hershme të së dielës.
VIDEO:
