Nënkryetari i partisë më të madhe opozitare gjermane, CDU/CSU, Johann David Wadephul, ka kritikuar itinerarin dhe deklaratat e kancelarit gjerman, Olaf Scholz, dhjetë ditë më parë në Ballkan. Gjatë një fjalimi në Bundestag, të mërkurën, me rastin e një debati për Ballkanin Perëndimor, Wadephul e quajti udhëtimin të dështuar, çka sipas tij dukej që nga ndalesat: “Njëherë në Prishtinë e më pas në Beograd. Që aty u duk se udhëtimi ishte tejet problematik”.
Wadephul e quajti amatoreske deklaratën e kancelarit gjerman socialdemokrat gjatë vizitës së tij në Beograd për domosdoshmërinë e njohjes së Kosovës nga Serbia, si parakusht për hyrjen e saj në BE.
“Kjo është e dëshirueshme dhe këtë e dinë të gjithë, por njohja duhet të vijë në fund të një procesi, ndërsa tani kjo deklaratë e thënë në publik në mënyrë kaq amatoreske e ngarkon të gjithë procesin, i cili është bërë i vështirë për Serbinë”, ka thënë Wadephul.
Ndryshe nga kancelarja gjermane, Angela Merkel, e cila në konferenca shtypi ishte e përmbajtur dhe dhe deklaratat i jepte zakonisht pas dyerve të mbyllura, kancelari aktual Olaf Scholz e befasoi opinionin në Serbi, me kërkesën e tij për njohjen e Kosovës. Vendosja e Kosovës në qendër, dhe jo në fund të procesit të normalizimit të marrëdhënieve mes Kosovës dhe Serbisë është një nga kërkesat kryesore të Kosovës për dialogun.
Në debatin e Bundestagut për Ballkanin Perëndimor, Wadephul foli në emër të grupit të tij parlamentar dhe prezantoi mocionin e këtij grupi për angazhim të Gjermanisë për afrimin e Ballkanit Perëndimor në BE. Mocioni kërkon ndër të tjera që qeveria gjermane të angazhohet me të gjitha forcat dhe me hapa konkrete për çeljen e negociatave me Shqipërinë dhe Maqedoninë e Veriut, për njohjen e Kosovës dhe anëtarësimin e saj në organizatat e ndryshme, për liberalizimin e regjimit të vizave me qytetarët e Kosovës.
Wadephul nuk harroi të kujtonte kushtet që ka vendosur Bundestagu për Shqipërinë për fillimin e negociatave me BE. “Unë pres nga qeveria gjermane që ajo të mbajë parasysh sidomos vendimet që ka marrë Bundestagu për Shqipërinë dhe Maqedoninë e Veriut, dhe të mos bëjë procedura të përshpejtuara”, u shpreh Wadephul.
Në rezolutën e miratuar nga Bundestagu në tetor 2019, parlamentarët gjermanë i dhanë dritën jeshile qeverisë gjermane që të çelte negociatat me Shqipërinë dhe Maqedoninë e Veriut, por grupi parlamentar CDU/CSU, ku bënte pjesë edhe kancelarja e atëhershme, Angela Merkel, i caktoi qeverisë gjermane nëntë kushte shtesë për Shqipërinë, para se kjo të vendoste për fillimin e negociatave. Vendimi i Bundestagut nuk është obligues për qeverinë gjermane./DW
