VV në Gjilan pastron borën nëpër trotuare, akuzon komunën

Në qendër të qytetit të Gjilanit disa aktivistë të subjektit politik të Lëvizjes Vetëvendosje kanë pastruar trotuaret nga bora si dhe kanë pastruar borën në hapësirat e institucioneve publike, raporton “Koha Ditore”.

Ky subjekt politik përmes një komunikate ka akuzuar komunën e Gjilanit se nuk është duke bërë përmbushur detyrën për pastrimin e rrugëve nga bora.

“Aktivistë të Lëvizjes Vetëvendosje! Qendra në Gjilan, janë mbledhur sot për të pastruar nga bora trotuaret e rrugës ‘Zija Shemsiu’, ndërkohë që kanë larguar borën edhe nga oborri i Qendrës së Mjekësisë Familjare ‘28 Nëntori’, duke e bërë të kalueshme edhe rrugën hyrëse për automjete në këtë qendër. Ky aksion i aktivistëve të Lëvizjes, ka ardhur si pasojë e mungesës së përkujdesit institucional që do të duhej të bëhej, çdo herë kur rrugët dhe trotuaret tona bëhen vështirë të kalueshme si pasojë e reshjeve të borës. Sot, reshjet e borës kanë filluar qysh në orët e para të mëngjesit dhe nuk vlen arsyetimi i ‘nxënies’ në befasi, sepse ka pasur kohë të mjaftueshme për marrjen e të gjitha masave të nevojshme, në mënyrë që automjeteve dhe kalimtarëve të rastit ti mundësohet qasje sa më e lehtë në rrugët dhe trotuaret e qytetit. Ndërkaq, ia përkujtojmë se Komuna e Gjilanit, shpenzon shuma parash për dhënien e tenderit për mirëmbajtje dimërore të rrugëve në qytet dhe fshatra, ndërsa pos problemeve në qytet, probleme edhe më të mëdha kanë banorët e fshatrave, ku as komunalitë nuk shkojnë për ti kryer shërbimet e tyre, sepse ankohen për pakalueshmëri të rrugëve të mbuluara nga bora”, thuhet në komunikatën e dërguar për media nga ky subjekt.