Vendosja e ngjitësve, mënyra e MI-së për zvogëlimin e veturave të paregjistruara

65 mijë llogaritet të jetë numri i veturave të cilat nuk janë regjistruar në dy vjetët e fundit. Me qëllim të zvogëlimit të kësaj dukurie, Ministria e Infrastrukturës së bashku me Byronë e Sigurimeve e Bankën Qendrore kanë planifikuar disa veprime, në mesin e së cilave është edhe vendosja e ngjitësve në veturat e regjistruara.

Identifikimi i automjeteve të paregjistruara do të jetë më i lehtë nga organet e rendit që nga 1 marsi.

Kjo për shkak të disa ngjitësve të cilët planifikohet t’u vendosen atyre që regjistrohen.

Një veprim i tillë është pjesë e një grupi masash, që Ministria e Infrastrukturës së bashku me Byronë Kosovare të Sigurimeve thonë se do të ndërmarrin me synimin e zvogëlimit të numrit të veturave të paregjistruara.

Zëvendësministri i Infrastrukturës, Hysen Durmishi, është i bindur që me masa të tilla qytetarët do t’i regjistrojnë automjetet e tyre. E kësisoj Kosova do të jetë më afër plotësimit të një nga kritereve për anëtarësim në Kartonin e Gjelbër.

“Pra, çdo veturë që regjistrohet prej datës 1 mars e ka obligative që ta vendosë stickersin, por stickersi është pa kosto, pa pagesë, pa ngarkesë për qytetarët. Brenda një viti, ne do t`i kemi të gjitha automjetet në Kosovë të cilat janë të regjistruara me stickers të vendosur dhe Policia e ka shumë lehtë mandej t’i identifikojë ato të cilat janë të paidentifikuara dhe dalin në komunikacion”, ka deklaruar Durmishi.

Në anën tjetër, nga Byroja Kosovare e Sigurimeve thonë se modalitetet e implementimit të këtij projekti do të vendosen gjatë javës së ardhshme.

Sipas drejtorit të BKS-së, Sami Mazreku, në Kosovë llogaritet që në dy vjetët e fundit 65 mijë vetura nuk janë regjistruara, e të cilat janë në mesin e rreth 200 mijë të tillave sa janë të paregjistruara nga 2002-ta.

“Nëse e bëjmë një llogari të thjeshtë, këto 65 mijë vetura në njërën anë nuk kanë paguar rreth 10 për qind të sigurimit, në anën tjetër byroja çdo vit paguan mesatarisht 5-6 milionë euro dëme të cilat këto vetura i shkaktojnë mirëpo nuk është vetëm dëmi financiar por edhe rreziku”, ka treguar ai.

Naser Lajqi është shefi i departamentit të komunikacionit në Universitetin e Prishtinës. Ai thotë se kushtet që duhet t’i plotësojë një veturë për t’u regjistruar garantojnë sigurinë e lëvizjes në rrugë.

“Një automjet i cili nuk është i regjistruar, ai nuk i ka këto dy elemente, nuk e ka as polisën e sigurimit të një kompanie të sigurimit, në rastin tjetër ai nuk e ka kaluar procedurën e kontrollit teknik, respektivisht të verifikimit të elementeve të sigurisë aktive të ndikojnë drejtpërsëdrejti në shkaktimin e aksidentit, konkretisht në sistemin e frenimit, të drejtimit të cilat janë elemente të domosdoshme”, ka thënë Lajqi.

Projekti për vendosjen e ngjitësve në veturat e regjistruara është mbështetur edhe nga Banka Qendrore e Kosovës.