Vëllai i Liridona Ademjat, Lonardi, ka thënë se ditëve të fundit janë duke u kontaktuar nga njerëz të ndryshëm të cilët u kanë ofruar informacione për vrasjen e saj.
Ai i ka lutur që informacionet që i kanë lidhur me tastin t’i ndajnë me policinë e prokurorinë.
“Ditët e fundit jemi duke u kontaktuar nga shumë njerëz të cilët kanë ofruar të ndajnë me neve informacione rreth vrasjes së Liridonës tonë. Ju lusim që të gjitha informacionet që i posedoni t'i ndani me policinë dhe prokurorinë dhe jo me neve. Hetimet ua kemi besu atyre dhe presim drejtësi profesionale dhe të shpejtë nga ana e gjykatës”, ka shkruar Ademaj në Facebook.
Ai ka thënë se interesi i tyre është që hetimet të mos dëmtohen nga askush.
“Interesi i familjes sonë dhe interesi i përgjithshëm është që hetimet të mos dëmtohen nga askush. Faleminderit të gjithëve për mbështetjen”, ka shkruar Ademaj.
Liridona Ademaj është vrarë më 29 nëntor dhe për këtë deri më tani janë arrestuar katër persona të dyshuar, përfshirë burrin e saj, Naim Murseli.
Rasti i vrasjes së Liridona Ademaj Murseli fillimisht u raportua si grabitje, ku mbeti e vrarë një grua, e pas hetimeve të kryera dyshimet janë që vrasja e saj është porositur nga bashkëshorti i saj, i cili i ka premtuar 30 mijë euro dorasit Granit Plava.
Vrasja e Liridonës është dënuar ashpër nga autoritetet në Kosovë, dhe është bërë thirrje për drejtësi.
Zemërim të shtuar ka shkaktuar fakti se dyshohet që vrasja është kryer në prani të dy fëmijëve të Liridonës.
Trupi i saj është zhvarrosur disa ditë pas varrimit, për t’u rivarrosur te varrezat e familjes së saj.