Sot (29 nëntor) janë bërë dy vjet nga vrasja e Liridona Ademajt, ndërsa familja e saj vazhdon të kërkojë që kriminelët të marrin dënimin e merituar.
Vëllai i saj, Liridon Ademaj, në një shkrim në rrjetet sociale ka thënë se mungesa e Liridonës vazhdon të ndihet çdo ditë dhe se dy vjetët e fundit kanë qenë të vështira për familjen.
“Na ka marrë malli shumë për prezencën tënde, asgjë më nuk është e njëjtë”, shkruan ai.
Familja ka premtuar të vazhdojë luftën për drejtësi.
“Do të luftojmë deri në frymën e fundit duke kërkuar drejtësi për ty. Kriminelët duhet të marrin dënimin e merituar”, ka shkruar tutje Liridoni.
Liridona Ademaj u vra më 29 nëntor të vitit 2023 në Prishtinë, teksa bashkë me dy fëmijët dhe burrin Naim Murseli po ktheheshin në shtëpi pasi kishin ngrënë darkë në një restorant. Fillimisht u raportua për vrasje si pasojë e grabitjes, e më pas Prokuroria bëri të ditur se gjithçka ishte inskenim i Murselit, bashkëshortit të viktimës.
Ajo dyshohet se u vra nga Granit Plava në sy të fëmijëve.
Veç Murselit dhe Plavës, i arrestuar është edhe Kushtrim Kokalla, që dyshohet se ka qenë në dijeni për vrasjen e Liridonës.
Rasti ende s’ka marrë epilog përfundimtar në gjykatë.
Të gjitha lajmet mbi gjykimin për vrasjen e Liridona Ademajt