Prokuroria kërkon burgim të përjetshëm për Murselin, Plavën e Kokallën

Vendimi për të akuzuarit për vrasjen e Liridona Ademajt do të jepet më 21 prill. 

Prokurorja Javorka Perlinçeviq në fjalën përfundimtare në gjykimin për vrasjen e Liridona Ademjat, ka kërkuar dënim më burgim të përjetshëm për tre të akuzuarit, Naim Murseli, Granit Plava e Kushtrim Kokalla. 

Ajo ka thënë se provat kanë vërtetuar se Murseli për shkak të shkak të raporteve bashkëshortore dhe fitimit financiar ka planifikuar vrasjen e bashkëshortes. 

“Provat e vërtetojnë se të akuzuarit e kanë kryer veprën penale”, ka theksuar Perlinçeviq.

Ajo ka thënë se vrasja e Ademajt ndodhi në prani të fëmijëve të saj që atë kohë ishin 4 e 6 vjeç.

Perlinçeviq ka thënë se vrasja e Ademjat është kryer me qëllim të përfitimit nga polica e sigurimit. 

“Në këtë shqyrtim gjyqësor është vërtetuar që në muajin qershor 2022, familja Murseli ka paguar policën e sigurimit në emër të Liridona Murselit. Menjëherë pas kesaj, Naimi ka kërkuar nga Kushtrim Kokalla që ta gjejë mënyrën që ta vrasë Liridonën, që do të thotë që me vetëdije është paguar polica e sigurimit jetësor për Liridonën”, ka deklaruar Perlinçeviq.
Gjithashtu prokurorja ka thënë se gjatë një vizite të hetuesve policorë, Murseli ka deklaruar që raportet e tij me Liridonën kanë qenë të prishura, gjë të cilën sipas saj e ka vërtetuar edhe i akuzuari Kushtrim Kokalla gjatë dëmishisë. 

Perlinçeviq ka thënë se gjithashtu Murseli ka deklaruar që Liridona nuk ka dashur të shkurorëzohet. 
Prokurorja ka thënë se gjatë procesit gjyqësor është argumentuar që të akzuuarit janë marrë vesh për vrasjen e Ademajt. 

“Gjatë analizimit të telefonit të Kushtrimit dhe Granitit se edhe Naimi me Granitin kanë qenë në lidhje çdo ditë, prandaj pas marrëveshjes në mes të Kushtrim Kokallës dhe Granit Plavës, vendoset qe Liridona të vritet me datë 29.11.2023, gjë që e vërteton edhe porosia të cilën Naim Murseli ia ka dërguar Granit Plavës, një ditë para vrasjes, ia ka dërguar me fjalët ‘Kjo përfundon nesër a të ka tregu Kuça (nofka e Kushtrimit)’, që do të thotë që marrëveshjet i kanë bërë Naimi dhe Kushtrimi, ndërsa Naimi të akuzuarit Granit Plava i ka premtuar që do t’i jep dëmshpërblim 30 mijë euro, pas vrasjes të cilën nuk ka arritur ta paguajë, sepse të akuzuarit janë arrestuar dy ditë pas vrasjes”, është shprehur Perlinçeviq.

Avokati i Murselit, Shemsedin Piraj, e ka quajtur të ashpër kërkesën për burgim të përjetshëm ndaj klientit të tij. Ka thënë se mbrojtja e tij do të vazhdojë procedurat pavarësisht vendimit të gjykatës tash.

“Pavarësisht se çfarë do të jetë vendimi i gjyqit, ne do vazhdojmë procedurat. Naimi ka dhanë tri deklarata, dhe i njëjti ka ngritur shumë shqetësime që është maltretu dhe keqtrajtu nga ana e zyrtarëve policorë, ka lyp takim me Inspektoratin Policor dhe çka u bo me këtë kërkesë nuk e di. U kërku një dënim mjaft i ashpër, unë kërkoj që gjitha pretendimet të vlerësohen dhe ta merrni një vendim të drejtë”, ka thënë ai. 

E mbrojtja e familjes së Liridona Ademajt ka mbështetur kërkesën e prokurorisë dhe ka deklaruar se vendimi duhet të jetë burgim i përjetshëm për të akuzuarit. 

Naim Murseli thotë se po akuzohet për një krim që s’e ka kryer

I akuzuari për vrasjen e Liridona Ademajt, Naim Murseli, ka dhënë fjalën përfundimtare në gjyqin për këtë rast. Ai ka thënë se po akuzohet për një krim që nuk e ka kryer dhe nuk ka qenë në dijeni për të.

“Unë gjatë këtyre viteve prej ngjarjes jam akuzuar për një krim shumë të rënd të cilin nuk e kam kryer. Unë nuk kam organizuar kurrfarë vrasje as nuk kam marr pjesë në vrasje madje as nuk e kam parë vrasjen as unë as fëmijët, sepse në momentin e vrasjes unë dhe fëmijët e mi kemi qenë duke ikur. Këtë e tregon edhe Leonardi në deklaratën e tij. Mund t’i shihni intervistat, ku ai shumë drejt dhe saktë tregon atë se çfarë i kanë treguar fëmijët dhe ai version është që unë dhe fëmijët kemi vrapuar nga makina”, ka thënë ai. 

Murseli ka folur për fëmijët e tij se nuk flet me ta për shkak të gjendjes në paraburgim, por jo sepse nuk duan fëmijët të flasin me të. 

“Pastaj në këtë proces gjyqësor pa të drejtë shumë herë disa herë është përmendur edhe Behgjet Pacolli i cili fare nuk ka lidhje me këtë rast dhe padrejtësisht ju është përmendur emri dhe kisha të nevojshëm që të sqaroj se ndjehem keq sa herë është përmendur emri i tij sepse është e padrejt. Ju do të merrni vendim së shpejti për këtë rast, ne kemi propozuar një CD ku shihet komunikim me fëmijët dhe e vetmja arsye pse nuk kam komunikim me fëmijët është gjendja në paraburgim jo pse fëmijët nuk dëshirojnë të flasin. Është e ulët që të citohen rrejshëm fëmijët mi”. 

Ndërkohë, Murseli ka mbrojtur veten tutje duke thënë se është bërë cak i mediave dhe se është dhënë një version i pavërtetë për të. 

“Natën e vrasjes ja dorëzova fëmijët familjes Ademaj po të kisha për të fshehur nuk do t’i dorëzoja… Ju betohem që Naim Murseli nuk ka qenë afër në veturë në momentin e vrasjes, ju betohem Naim Murseli nuk ka paguar për vrasjen, kjo është e vërtetë. Unë pa të drejta jam akuzuar, targetuar nga mediat nga kjo sallë por e vërteta është krejtësisht ndryshe. Ju do të vendosni fatin tim, fatin e fëmijëve të mi, dhe nga ju pres vetëm një dënim të drejtë, pres nga ju që vërtetë të ketë drejtësi për Liridonën, sepse kjo Liridona meriton drejtësi të plotë”.

VIDEO:

Sot fjala përfundimtare në gjykimin për vrasjen e Liridona Ademajt

Sot në gjykimin për vrasjen e Liridona Ademajt, ku të akuzuar janë bashkëshorti i saj Naim Murseli, Granit Palva e Kushtrim Kokalla,  pritet të jepen fjalët përfundimtare.

Gjykimi do të nisë në orën 9:30.

Sipas aktakuzës, Murseli, Plava dhe Kokalla janë dakorduar paraprakisht që vrasja e Liridona Ademajt të kryhej nga i akuzuari Plava, nën marrëveshjen që Murseli t’i paguajë atij 30 mijë euro.

I gjithë plani për vrasjen, sipas aktakuzës, është bërë nga bashkëshorti i viktimës, tani i akuzuari Naim Murseli, si pasojë e çrregullimit të raporteve familjare dhe martesore, për të cilin shkak edhe ka lindur dëshira e tij për hakmarrje.

Në aktakuzë theksohet po ashtu se plani fillimisht i është shpalosur Kokallës nga ana e Murselit, porse ai ka refuzuar që ta gjejë një mundësi për vrasjen e Liridonës, e më pas Kokalla e ka gjetur Plavën e të cilin e ka njoftuar me Naimin.

E vetë Naim Murseli, sipas aktakuzës, e ka siguruar armën me 20 fishekë nga i akuzuari Tom Dodaj, me të cilën e ka kryer vrasjen.

Dodaj, i cili ua shiti armën Murselit e Plavës për 280 euro dhe ka pranuar fajësinë. Themelorja e dënoi me 5 vjet burgim, e më pas Apeli ia uli në tre vjet.

Në seancën fillestare më 31 janar 2025, Murseli është deklaruar i pafajshëm. Plava nuk është deklaruar rreth fajësisë, ndërsa Kokalla ka kërkuar kohë për t’u konsultuar me mbrojtjen.