Në Dhomat e Specializuara të Kosovës (DhSK) në Hagë, edhe të martën po vazhdon dëshminë ish-këshilltari politik i Wesley Clark, John Stewart Duncan në gjykimin ndaj Hashim Thaçit, Kadri Veselit, Rexhep Selimit dhe Jakup Krasniqit.
Pyetjet për këtë dëshmitar është duke i vazhduar prokurori Matt Halling, raporton “Betimi për Drejtësi”.
Prokurori u fokusua tek linja e pyetjeve se deri në çfarë mase ishin përfshirë komandantët e zonave në negociatat e 17 qershorit 1999 për nënshkrimin e marrëveshjes së demilitarizimit.
Dëshmitari tha se nuk e bën dot komentimin e emrave të komandantëve që mund të kenë qenë të pranishëm në këtë takim, duke e ripërsëritur që nuk është i mirë me emrat.
Duncan tha se nëse përmenden emrat nga prokurori duke iu referuar ndonjë fotografie, mund edhe ta bëjë një gjë të tillë.
Dëshmitari u pyet për Bislim Zyrapin, me këtë rast ai sërish tha se pas 26 vitesh është e vështirë t’i kujtohen emrat.
Ndërkaq, kur u pyet për një fotografi ku shihej Xhavit Haliti, ai tha se ky nuk është personi që i ishte prezantuar me këtë emër në Tiranë. Pas kësaj, ai kërkoi që seanca të kalojë në private, për të shpjeguar diçka e cila nuk u kundërshtua nga trupi gjykues dhe palët tjera në procedurë.
Në këtë seancë, të gjithë të akuzuarit janë prezent në sallën e gjyqit. Ndërsa, kur erdhi dëshmitari në sallë, u shfaqën probleme teknike në kompjuterin e gjyqtarit, Christoph Barthe.
John Duncan për Kadri Veselin: Ishte person me funksion të lartë në zbulim
Dëshmitari John Duncan duke iu referuar një videoje të një takimi që ishte mbajtur në mes komandantëve të zonave dhe persona të tjerë nga UÇK-ja ku zhvilloheshin negociatat për Marrëveshjen e Demilitarizimit, tha se Kadri Veselin ishte një person me funksion të lart në zbulim.
“Me sa më kujtohet mua, është një person me funksion të lartë dhe në funksionin policor dhe të zbulimit”, tha ai, raporton “Betimi për Drejtësi“.
Ai tha se nuk e thotë dot se si e di këtë gjë për Kadri Veselin.
Prokurori Matt Halling pyeti dëshmitarin se a ka arsye për të kundërshtuar nëse i thuhet se ky person është Kadri Veseli. Duncan tha se nuk ka arsye për ta bërë një gjë të tillë.
Më pas, dëshmitarit iu prezantua një fotografi tjetër në të cilën shiheshin katër persona që për tre prej tyre tha se kanë qenë komandantë të zonave, duke përfshirë edhe Rrustem Mustafën-Remin.