Liderë institucionalë e partiakë kanë uruar besimtarët myslimanë për festën e Fitër Bajramit.
Ata të hënën kanë uruar për më shumë solidaritet e begati.
Osmani: Të kalojë kjo festë në frymën e solidaritetit
Presidentja e Kosovës, Vjosa Osmani, ka uruar festën e Fitër Bajramit të gjithë besimtarët myslimanë.
Në urimin e saj, Osmani ka thënë se kjo festë duhet të karakterizohet me solidaritet.
“Frymën solidare duhet ta dëshmojmë çdoherë, e posaçërisht në festat si kjo, kur duhet t`ua zgjasim dorën njerëzve në nevojë. Kjo festë është, po ashtu mundësi e mirë për forcimin e mirëkuptimit, afërsisë ndërnjerëzore me dëshirën e përbashkët për zhvillimin e tolerancës dhe respektit të ndërsjellë”, thuhet në urimin e saj, përcjell Zyra e Presidencës të hënën.
Kurti uron për më shumë solidaritet e begati
Kryeministri Albin Kurti, i ka uruar besimtarët myslimanë me rastin e festës së Fitër Bajramit.
Ai përmes një postimi në Facebook, të hënën, ka uruar për më shumë solidaritet e begati.
“Pas një muaji agjërim, vetëpërmbajtje dhe sakrificë, besimtarët myslimanë sot ndajnë gëzimin e Fitër Bajramit. Le të marrim të gjithë nga pak nga përditshmëria e muajit të Ramazanit dhe ta bëjmë përditshmëri për tërë vitin. Agjërimi le të na bëjë më falënderues për begatitë. Vetëpërmbajtja le të na bëjë më të disiplinuar ndaj lakmisë. Sakrifica le të na bëjë më solidarë me njëri-tjetrin. Me urimin dhe shpresën që agjërimi dhe lutjet tuaja janë pranuar, me fat të gjithëve Fitër Bajrami”, ka uruar Kurti.
Konjufca falënderon BIK-un për kultivim të solidaritetit dhe bamirësisë
Kryetari i Kuvendit të Kosovës, Glauk Konjufca, ka uruar besimtarët myslimanë për festën e Fitër Bajramit.
Konjufca e ka falënderuar myftiun Naim Tërnava për kontributin që Bashkësia Islame e Kosovës ka dhënë për kultivimin e solidaritetit dhe bamirësisë, gjatë vizitës që i ka bërë kësaj organizate të hënën.
“Shfrytëzoj rastin t’iu uroj festën të gjithë besimtarëve myslimanë. E falënderova myftiun Tërnava për kontributin që ka dhënë BIK për rolin pozitiv në komunitetin mysliman”, ka thënë Konjufca.
Sipas Konjufcës, BIK-u po luan rol të jashtëzakonshëm edhe në përkujdesjen për skamnorët.
Krasniqi: Fitër Bajrami i jep vlerë familjes, miqësisë e bashkëpunimit
Kryetari i Partisë Demokratike të Kosovës, Memli Krasniqi, ka vizituar të hënën Bashkësinë Islame të Kosovës, nga ku ka uruar festën e Fitër Bajramit për të gjithë qytetarët e besimit islam.
Krasniqi ka thënë se kjo festë është moment i rëndësishëm, pasi sipas tij, gjithmonë është shënuar me bashkimin rreth sofrës së përbashkët, duke i dhënë vlerë familjes, miqësisë e bashkëpunimit.
Ai ka shprehur mirënjohje për BIK-un duke thënë se po bën punë të madhe duke ndihmuar familjet në vështirësi.
“E shfrytëzoj edhe një herë që të gjithë qytetarët e besimit islam t’i uroj edhe një herë Fitër Bajramin, paçi shëndet dhe gëzime gjithmonë në familjet e juaja”, ka thënë ai.
Abdixhiku: Sakrifica e vlerat njerëzore të domosdoshme për shoqëri me zhvillim të begatshëm
Kryetari i Lidhjes Demokratike të Kosovës, Lumir Abdixhiku, ka uruar festën e Fitër Bajramit për qytetarët e besimin islam.
Abdixhiku ka shkruar në Facebook, se kjo festë duhet të rikujtojë se sakrifica dhe vlerat njerëzore ndaj njëri-tjetrit janë të domosdoshme për shoqëri me zhvillim të begatshëm.
“Qytetarët e Kosovës gjithmonë janë shquar për vlera humane, vëllazërore dhe solidariteti, duke u dëshmuar si shoqëri që respekton njëri tjetrin e ndanë me ata në nevojë - prandaj, le të vazhdojmë t’i mbajmë këto vlera edhe përtej muajit të shenjtë e përtej Festës së Bajramit”, ka thënë Abdixhiku në urimin e tij të publikuar në Facebook.
Për festë të Fitër Bajramit ka uruar edhe lideri i Aleancës për Ardhmërinë e Kosovës, Ramush Haradinaj.
Ai ka publikuar një fotografi në llogarinë e tij në Facebook, teksa shihet duke shijuar ëmbëlsira me të disa të afërm të tij.