Trajneri i futbollit angazhohet asistent për nxënësit me aftësi të kufizuara

Drejtoria e Arsimit ka punësuar në janar një trajner futbolli me inicialet M.M. si asistent në shkollën “Rilindja” në fshatin Dobroshec. Drejtori i Arsimit në komunë, Muhamet Gjoka, ka pranuar se punësimi i asistentit është bërë pa konkurs dhe pa kualifikim. Edhe pse ka pranuar se nuk ka kualifikim adekuat, i angazhuari ka thënë se është asistenti i duhur për nxënësin, pasi sipas tij, fëmija ka nevojë për aktivitete fizike

Njësia për Hetimin e Krimeve Ekonomike dhe Korrupsion ka filluar hetimet nën dyshimin se zyrtarë në Drejtorinë e Arsimit në Drenas kanë punësuar një asistent për nxënësit me aftësi të kufizuara pa konkurs dhe pa kualifikim.

Drejtoria e Arsimit ka punësuar në janar një trajner futbolli me inicialet M.M. si asistent në shkollën “Rilindja” në fshatin Dobroshec.

Drejtori i Arsimit në komunë, Muhamet Gjoka, ka pranuar se punësimi i asistentit është bërë pa konkurs dhe pa kualifikim.

“Personi në fjalë është angazhuar nga Drejtoria e Arsimit për punë praktike bazuar në Ligjin e Punës, pra Drejtoria e Arsimit nuk nxjerr asnjë vendim pa bazë ligjore, kushdo që ka pretendime se ka pasur anashkalim, ka organe që e vërtetojnë, ne e kemi të bazuar, ligji është i qartë, decidivisht përmenden rastet kur mundet me u angazhu me specifika të rastit, me rekomandim psikologut dhe ka qenë zgjidhja e vetme për rastin”, ka thënë Gjoka.

Ligji i Punës, të cilit i referohet Gjoka, ka për qëllim të rregullojë të drejtat dhe detyrimet nga marrëdhënia e punës, por jo edhe kriteret për punësimin e një asistenti për nxënës me aftësi të kufizuara.

Edhe Arbëri 29 kor 2023 Drenasi angazhon asistentë të pakualifikuar për nxënës me aftësi të kufizuara

Angazhimi i asistentëve në shkolla për këtë kategori parashihet me Udhëzim Administrativ.

Aty specifikohet se asistenti për fëmijët me aftësi të kufizuara duhet të ketë të përfunduar nivelin e pestë të trajnimit parësor.

Në shkollën “Rilindja” thonë se nxënësi për të cilin është angazhuar trajneri i futbollit është vështirë i menaxhueshëm.

“Meqenëse fëmija është i një kategorie pak më ndryshe se fëmijët e tjerë, ne kemi kërkuar nga DKA-ja që të angazhojë një asistent duke specifikuar, pa diskriminim gjinie, një asistent të moshës madhore dhe me kualifikim dhe patjetër me qenë i gjinisë mashkullore, pasi që menaxhimi nga mësuesja mbështetëse ka qenë i pamundur”, ka thënë Arsim Avdyli, drejtor në SHFMU “Rilindja”.

Avdyli ka thënë se asistenti nuk është paraqitur në shkollë gati një javë.

Trajneri i angazhuar si asistent, ka deklaruar për KOHËN se ka munguar për shkak të gjendjes së rëndë shëndetësore të bashkëshortes së tij.

Edhe Arbëri 6 pri 2025 Qehaja: Mungesa e asistentëve për fëmijët me aftësi të kufizuara, problem për përfshirjen e tyre në shkollim

Edhe pse ka pranuar se nuk ka kualifikim adekuat, ai ka thënë se është asistenti i duhur për nxënësin, pasi sipas tij, fëmija ka nevojë për aktivitete fizike.

KOHA ka biseduar edhe me familjen e nxënësit. Nëna e tij ka thënë se prania e trajnerit ka pasur ndikim pozitiv te fëmija.