“Furnizim me barna dhe pajisje të imëta mjekësore për Departamentin e Shëndetësisë në Burgje” është tenderi që ka nisur në qershorin e sivjetmë, porse nuk është nënshkruar ende. I kishte kaluar të gjitha fazat e prokurimit dhe ishte bërë gati për nënshkrim edhe draftkontrata. Por, në moment të fundit është anuluar nga sekretari i përgjithshëm i Ministrisë së Shëndetësisë, pasi çmimet ishin më të larta sesa ato parapraket dhe nuk ishte vendosur fare kriteri ligjor i Autorizim Marketingut. Lënda ka përfunduar në Organin Shqyrtues të Prokurimit, ndërsa janë iniciuar masa ndaj zyrtarëve të përfshirë të Ministrisë së Shëndetësisë
Një tender për furnizim me barna të Shërbimit Shëndetësor të Burgjeve, i cili funksion në kuadër të Ministrisë së Shëndetësisë, ka mbetur i bllokuar për tash e disa muaj.
Çmimet e larta për disa lote dhe telashet që kanë buruar nga dosja e tenderit janë shkaqet përse kontrata ende nuk është nënshkruar, ndonëse janë kaluar të gjitha fazat e tenderimit.
Tenderi ka shpërfaqur njashtu akuzat e hallkave të brendshme në sistemin e shëndetësisë për keqmenxhimin me procesin e prokurimit.
Më 13 të korrikut të sivjetmë ishte rekomanduar operatori ekonomik “Sinorg Pharmaceuticals”. E në muajin gusht, në Ministrinë e Shëndetësisë njoftuan se është marrë vendimi që tenderi, me vlerë të parashikuar prej 333 mijë eurosh, të anulohej. Po në gusht kompania ka ushtruar ankesë kundër vendimit për anulim, fillimisht tek Autoriteti Kontraktues, në të cilën instancë ka marrë përgjigje refuzuese.
Nga shkalla e dytë e ankimimit, që është Organi Shqyrtues i Prokurimit (OSHP), kompanisë i ishte dërguar edhe draft-kontrata.
Në ankesën e ushtruar operatori ka pretenduar se tenderi ishte nënshkruar nga zyrtari përgjegjës i prokurimit, ndonëse nënshkrimi është refuzuar nga ana e sekretarit të përgjithshëm të këtij institucioni, Naim Bardiqi. Këtë operatori e ka vlerësuar si ndërhyje në proces.
“Vetë fjala se në fazën e nënshkrimit të kontratës nga zyrtari kryesor administrativ është refuzuar nënshkrimi i kësaj kontrate, nënkupton se kontrata është nënshkruar nga zyrtari përgjegjës i prokurimit por është refuzuar nga ZKA-ja”, thuhej në ankesën e kompanisë “Sinorg Pharmaceuticals”.
Në shkresat e dorëzuara në OSHP, Ministria e Shëndetësisë ka përmendur disa arsye për anulimin e procedurës.
“Zyrtari kryesor administrativ me shkresë zyrtare ka njoftuar për ndaljen e këtij procesi për arsyet që ndërlidhen me: Aspektin ligjor rreth Autorizimit për Marketing, përfshirjes së 255 artikujve në një lot, si dhe disa artikuj kanë çmim shumëfish më të larta se ato të kontratave të Administratës Qendrore të Ministrisë së Shëndetësisë”, thuhet në njërën prej shkresave.
KOHA i është drejtuar Ministrisë së Shëndetësisë me pyetje lidhur me çështjen qysh prej muajit gusht. Bazuar në burime të KOHËS, sekretari i kësaj ministrie ka iniciuar masa ndaj shefit të prokurimit dhe zyrtarit përgjegjës të prokurimit. Për ta shmangur masën disiplinore, njëri prej tyre ka dorëzuar një dokument, në të cilin ka theksuar se gabimi ka ndodhur për shkak se ai ishte i sëmurë.
Në Ministrinë e Shëndetësisë nuk u janë përgjigjur pyetjeve të drejtuara rreth çështjes, me justifikimin se bëhet fjalë për “të dhëna konfidenciale”.
“Ndërlidhur me pyetjet tuaja të datës 22.8.2022, gjeni përgjigjet si në vijim! Ministria e Shëndetësisë është në proces të punës sa i përket tenderit, të cilit i referoheni. Ndërsa sa u përket pyetjeve që kanë të bëjnë me zyrtarin e MSh-së (I.H.), Ministria e Shëndetësisë për shkaqe etike nuk mund të deklarohet për shëndetin e nëpunësve të vet individualisht”, është thënë në përgjigjen e Ministrisë.
KOHA i ka drejtuar shtatë herë pyetur Ministrisë lidhur me arsyet për anulimin e tenderit, porse në asnjërin rast nuk ka marrë përgjigje.
Në shtator KOHA ka paraqitur ankesë rreth çështjes tek Agjencia për Privatësi, e cila e detyroi Ministrinë e Shëndetësisë që të deklarohet mbi arsyet që kanë çuar deri te njoftimi për anulimin e tenderit.
“Kontrata për të cilën kanë qenë pyetjet nuk është nënshkruar nga sekretari i përgjithshëm, për shkak se SP ka konstatuar se Departamenti i Shërbimeve të Burgjeve - DSHB dhe Zyra e Prokurimit kanë refuzuar të përfillin kërkesën për Autorizim Marketing në aktivitetin e prokurimit në fjalë, derisa ekziston një qëndrim dhe opinion ligjor, i cili i thotë MSh-së se blerja pa Autorizim Marketing përbën shkelje të Ligjit për Produkte dhe Pajisje Medicinale”, thuhet në përgjigjën e Ministrisë së Shëndetësisë.
Posedimin e Autorizim Marketingut në Ministri e kanë kualifikuar si një kriter që nuk mund të tejkalohet, shkaku që për këtë çështje ka pasur interesim edhe nga Policia e Kosovës.
“Për këtë çështje janë marrë në pyetje, me kërkesë të prokurorit, nga Policia e Kosovës zyrtarë të MSh-së. Pra, për shkak se është konstatuar se DSHB-ja dhe Zyra e Prokurimit nuk kanë përfillur kërkesën për Autorizim Marketingu - AM - dhe kanë hapur procedurë të prokurimit, dhe po ashtu disa produkte në listë nuk ishin të regjistruara në AM”, thuhet në përgjigje.
Deri më tani ankesa e kompanisë së rekomanduar si fituese e tenderit nuk është trajtuar nga Organi Shqyrtues i Prokurimit. Megjithëkëtë, eksperti e ka përfunduar ekspertizën dhe dokumenti është në favor të Operatorit Ekonomik.
“Duke u bazuar në vlerësimet dhe konstatimet e lartcekura, eksperti shqyrtues i rekomandon Panelit Shqyrtues që ankesa e Operatorit Ekonomik ankues të aprovohet e bazuar dhe të anulohet njoftimi i Autoritetit Kontraktues për anulim të aktivitetit të prokurimit”, thuhet në mendimin e ekspertit shqyrtues.
Çështja e Autorizim Marketingut, i cili e përbën pasaportën e një ilaçi dhe që e garanton cilësinë, efikasitetin e sigurinë e tij, ka tërhequr së fundi vëmendjen e publikut.
Në institucione kanë shprehur interpretime të ndryshme nëse për secilin rast do të duhej që të kufizohej dhe të bëhej ndërlidhja e pjesëmarrjes në tender me posedimin e kësaj lejeje.
Pas raportimeve të KOHËS, Ministria e Shëndetësisë e ka ndryshuar një udhëzim administrativ, nëpërmjet të cilit kufizohej një pjesëmarrje e tillë.
(Ky hulumtim është realizuar në kuadër të projektit të KDI-së: “Promovimi i integritetit në proceset e prokurimit publik në kohë pandemie”)