Ministri i Punëve të Brendshme, Xhelal Sveçla, ka sqaruar se si ka ndodhur plagosja e një qytetari në veri.
Ai ka thënë se vozitësi nuk ishte ndalur pas sinjalit të policit duke vazhduar në drejtim të Zveçanit, ku zyrtari policor ka shtënë me armë në drejtim të veturës duke plagosur vozitësin.
“Pas informatave të para për plagosjen e një qytetari në rrugën nacionale mes Leposaviqit dhe Zveçanit, Policia e Kosovës por edhe Inspektoriati Policor i Kosovës kanë filluar hetimet intenzive. Sipas hetimeve të para, pas sinjalit të zyrtarit policor për ndalim, vozitësi nuk është ndalur por ka vazhduar në drejtim të Zveçanit. Pas kësaj, një zyrtar policor ka shtënë me armë në drejtim të veturës ku si pasojë, ka mbetur i plagosur qytetari M.J”, ka thënë Sveçla.
Sveçla ka shtuar se hetimet po vazhdojnë intensivisht.
“Pas intervistimit nga ana e Inspektoriatit Policor dhe me vendim të prokurorit, 4 zyrtarë policor janë arrestuar dhe janë dërguar në mbajtje për 48 orë me dyshimin se tre zyrtarë policorë nuk kishin raportuar lidhur me rastin dhe një zyrtar për mos raportim si dhe për përfshirjen e tij në rast. Të njejtit gjatë ditës me rekomandim të IPK-së janë suspenduar nga PK”.
