-
Nga:
Vlerë Mehmeti
- 28 qershor 2025 21:25
- Shpërndaje në:
Një kombibus i Spitalit të Prizrenit, në vlerë 25 mijë euro, është “zhdukur” që prej dy vjetësh. Ndonëse ky automjet figuron si pasuri e spitalit, Zyra Kombëtare e Auditimit ka gjetur se nuk ka evidenca që e dëshmojnë ekzistencën e tij. Për këtë rast Spitali nuk ka ofruar përgjigje, e në SHSKUK kanë thënë se ky rast është duke u hetuar
Prej së paku dy vjetësh, Spitalit të Prizrenit i është zhdukur një automjet në vlerë prej 25 mijë eurosh.
Zyra Kombëtare e Auditimit (ZKA) në Raportin për pasqyrat financiare vjetore të Shërbimit Spitalor Klinik e Universitar (SHSKUK) për vitin 2024, ka gjetur se për këtë kombibus nuk ka evidenca të cilat ia dëshmojnë ekzistencën.
Mbështete KOHËN. Ruaje të vërtetën.
Gazetaria profesionale është interes publik. Mbështetja juaj ndihmon që ajo të mbetet e pavarur dhe e besueshme. Kontribuoni edhe ju. 1 euro e bën dallimin.
Letër lexuesit — pse po kërkojmë mbështetjen tuaj Kontribuo“Për pasurinë nuk ishte siguruar evidenca që do ta dëshmonte ekzistencën e saj dhe se është në përdorim, apo se pasuria është tjetërsuar apo dhuruar. Për të njëjtën ishte raportuar edhe në raportin e vitit paraprak, mirëpo gjendja vazhdon të jetë e njëjtë. Kjo kishte ndodhur për shkak të mungesës së politikave të qarta për regjistrimin, verifikimin dhe mbajtjen e pasurisë”, thuhet në raportin e ZKA-së.
Bazuar në këtë raport, mosmenaxhimi i pasurisë së Spitalit e mundëson keqpërdorimin e saj.
“Pamundësia për ta dëshmuar ekzistencën fizike të pasurisë, të cilën e mban në regjistra, në mungesë të informatave për të njëjtën, e rrit mundësinë e keqpërdorimit të pasurisë, humbjes apo tjetërsimit”, është theksuar në raport.
Zyra Kombëtare e Auditimit i ka rekomanduar Bordit Drejtues dhe drejtorit të përgjithshëm të SHSKUK-së që të forcojnë kontrollet në menaxhimin e pasurisë, në mënyrë që të evitohet mundësia e humbjes apo e keqpërdorimit të saj.
Në SHSKUK kanë bërë të ditur se Spitali i ka informuar që rasti është iniciuar në njësinë rajonale për hetimin e krimeve ekonomike dhe të korrupsionit, porse nuk kanë treguar se kur ka nisur hetimi dhe se çfarë informatash posedojnë për të.
“Ju njoftojmë se nga drejtoresha e Spitalit të Prizrenit jemi njoftuar se rasti është iniciuar në njësinë rajonale për hetimin e krimeve ekonomike dhe korrupsion!”, kanë thënë në SHSKUK.
Informata të tjera për zhdukjen e automjetit nuk kanë dhënë as në Spitalin e Prizrenit.
Në raportin e Auditorit janë listuar 11 gjetje për Shërbimin Spitalor Klinik e Universitar. Ajo për mungesën e kombibusit 25 mijë eurosh është në mesin e atyre që ZKA-ja e ka pasur bazë kur ka dhënë opinion të kualifikuar për këtë institucion.