Shumë pak ndihmë për Suharekën e vërshuar, banorët e Sopisë natën e kaluan jashtë shtëpive

Hazir Muhametsahitaj, shtëpia e të cilit është bërë e pabanueshme nga vërshimet e dy ditëve më parë, natën e ka kaluar te axha i tij.

Ai thotë se pret ndihmë nga komuna pasi vet nuk mund t’ia dalë, pasi para pak muajve e kishte rinovuar shtëpinë.

Nga të reshurat e dy ditëve të kaluara, fshati Sopi është më i dëmtuari, pothuajse të gjitha shtëpitë janë të pabanueshme.

Por ndonëse kryetari i komunës dhe Kryqi i Kuq në Suharekë kanë bërë apel te të gjitha bizneset, organizatat humanitare dhe institucione tjera që t’i ndihmojnë me veshmbathje, ushqim, e ujë të pijes familjet e të prekurve, por përveç një firme zvicerane që ka dhënë donacion 5 mijë euro, nuk ka pasur të interesuar që t’iu ndihmojnë.

Ndryshe, Komuna ka përgatitur vend në rast se ka nevojë për evakuim të banorëve.

Kryetari i kësaj komune thotë se dëmet në këtë komunë janë shumë të mëdha, andaj të hënën do të dihet saktë vlera e tyre.