Dy deputetët e Aleancës Kosova e Re do të votojnë pro rrëzimit të Qeverisë Hoti sapo që mocioni i mosbesimit të dalë para deputetëve në Kuvendin e Kosovës, ka thënë Naim Murseli, këshilltar i kreut të AKR-së, Behgjet Pacolli. AKR-ja konsideron se një gjë e tillë duhet të ndodhë sa më shpejtë.
Të enjten AKR-ja, përmes Murselit, njoftoi se e mbështet rrëzimin e qeverisë së udhëhequr nga Avdullah Hoti. Vetë Murseli, më vonë, ka thënë për KOHËN se kjo parti është e gatshme të japë nënshkrimet për mocionin e iniciuar nga Vetëvendosje “në momentin që partitë opozitare bashkohen për këtë qëllim”.
Në një përgjigje për KOHËN ai ka thënë se AKR-ja ende s’ka diskutuar çështjen e mocionit me Lëvizjen Vetëvendosje, që si partia më e madhe opozitare tashmë ka bërë gati nënshkrimet e grupit të vet parlamentar me 31 deputetë.
I pyetur lidhur me qëndrimin e partisë tjetër opozitare, PDK-së, e cila ishte shprehur se nuk e nënshkruan mocionin, por e voton atë në Kuvend, Murseli ka thënë shkurt se “rrëzimi i Qeverisë Hoti do të votohet në momentin që kërkohen votat e AKR-së”.
E pikërisht me votat e AKR-së, Avdullah Hoti kishte arritur të bëhej kryeministër. Hoti ishte bërë kryeministër me minimum votash, 61, më 3 qershor. Ndër këto vota, ishin edhe dy të AKR-së, ajo e Behgjet Pacollit dhe ajo e Mirlinda Sopit.
PDK-ja të enjten, në një përgjigje të shkurtër ka thënë se nuk ka ndryshuar qëndrim sa i përket çështjes së mocionit. Kjo parti vazhdimisht ishte shprehur se nuk do të nënshkruajë mocionin, por kur ai të dalë në votim, do ta përkrahë.
Për mbajtjen e seancës për shqyrtimin e mocionit të mosbesimit nevojiten 40 nënshkrime deputetësh. Vetëvendosje ka 31 deputetë në grupin e saj parlamentar. Për rrëzimin e një qeverie duhet shumica e të gjithë deputetëve. Nëse dështon mocioni i mosbesimit, mocioni tjetër nuk mund të ringrihet gjatë 90 ditëve të ardhshme.