Shqipëria aktivizon njësitet emergjente për shuarjen e zjarreve

Zjarreve të verës nuk i ka shpëtuar as Shqipëria. Dhjetë vatra të tilla janë shuar në territorin e Shqipërisë në 24 orët e fundit nga forcat emergjente civile të ndihmuar edhe nga Forcat e Armatosura.

100 efektivë të Forcave të Armatosura, katër mjete dhe helikopteri janë angazhuar në këto orë për shuarjen e zjarreve, ka thënë ministri i Mbrojtjes, Niko Peleshi.

Peleshi ka theksuar se situata po monitorohet vazhdimisht pasi ekziston rreziku që mbeturinat të vazhdojnë të digjen.

“Po shkon drejt shuarjes përfundimtare zjarri në malin e Shpiragut, ku 100 trupa dhe helikopteri Cougar i Forcave i Armatosura janë angazhuar maksimalisht prej dy ditësh për neutralizimin e plotë të flakëve. Është nën kontroll vatra, në fshatin Rrilë, njësia administrative Shënkoll në bashkinë Lezhë, në vendgrumbullimin e mbetjeve urbane. Zjarri është shuar dhe situata po monitorohet pasi mbeturinat mund të vazhdojnë të digjen në brendësi pa u shfaqur në sipërfaqe”, ka njoftuar ai.

Peleshi ka thënë tutje se një zjarr në fshatin Theth është riaktivizuar.

“Në fshatin Bushat, në Vaun e Dejës, zjarri në një sipërfaqe me mbeturina, është shuar plotësisht dhe zjarrvënësi është shoqëruar nga efektivët e Policisë së Shtetit”, ka deklaruar ministri.