Organizata “Avonet”, thotë se Inspektorati i Punës që menaxhohet nga niveli qendror gjatë vitit të kaluar një pjesë të madhe të bizneseve nuk i ka inspektuar fare.
Kjo organizatë thotë se në Komunën e Ferizajt në shumë raste po shkelen të drejtat e punëtorëve dhe po rrezikohet jeta e tyre.
Ata kanë përmendur rastin e fundit, kur një punëtor humbi jetën në projektin “Bashkimi i Qytetit” dhe lëndimin e rreth 40 punëtorëve nga shpërthimi i bombolës në një lokal.
“Inspektorati duhet të jetë më efikas në mbikëqyrjen e projekteve jo vetëm në “Bashkimin e Qytetit”, por për tërë projektet që ndodhin në regjionin e Ferizajt, por në të njëjtën kohë të rrisin edhe ndëshkimet ndaj operatorëve ekonomikë për ata të cilët nuk sigurohen apo nuk kanë marrë masa sigurie në punishtet e tyre dhe punë me të cilën kryhen”, thotë Kenan Gashi nga “Avonet”.
Sipas Gashit, në shumë biznese ndërtimore dhe afariste punëtorët nuk kanë fare kontrata të punës e nuk kanë pajisje me masa mbrojtëse dhe punojnë pa ndonjë orar të caktuar.
Edhe në Komunën e Ferizajt kanë thënë se mosefikasiteti i inspektorëve të punës nëpër biznese ndërtimore dhe nëpër lokale afariste po shkakton probleme serioze.
“Si duket në këtë pikë si shtet jemi paksa të brishtë. Jemi për forcimin e Inspektoratit, qoftë ai komunal apo i punës dhe kërkojmë nga institucionet e tjera qendrore që të bëjnë forcimin e inspektorateve jo vetëm me anë të ligjeve, por edhe me çdo kompetencë të mundshme”, tha Bekim Ademi, drejtor për Shëndetësi dhe Mirëqenie Sociale.
KOHA ka kontaktuar me shefin e Inspektoratit të Punës për rajonin e Ferizajt, Halil Hasani, por ai nuk ka pranuar të flasë rreth kësaj çështjeje.
Në Komunën e Ferizajt janë të regjistruara rreth 12 mijë biznese të ndryshme.
