Serbia nuk ndryshon, falënderon Iranin për mosnjohje të Kosovës
Serbia nuk po e ndal fushatën anti-Kosovë. Të enjten, kryeministri i Serbisë, Gjuro Macut, ka falënderuar ambasadorin iranian në Serbi, Sadegh Fazli, për qëndrimin e Iranit për mosnjohjen e Kosovës.
Në një komunikatë për media nga Qeveria e Serbisë, është thënë e Macut i ka vlerësuar raportet me Iranin në nivelin më të lartë dhe ka theksuar se “Serbia është falënderuese që Irani nuk e njeh pavarësinë e vetëshpallur të ‘Kosovës’”.
Macut dhe Fazli kanë thënë se dy shtetet synojnë të rrisin bashkëpunimin në disa sektorë.
Serbia ditë më parë u kritikua në diskutimet e Nënkomisionit për Evropën në Dhomën e Përfaqësuesve të Shteteve të Bashkuara. Ajo u kritikua edhe se po u shërben interesave ruse në rajon. Kryetari republikan i këtij nënkomisioni, Keith Self, u shpreh se shpreson që Serbia më në fund ta njohë sovranitetin e Kosovës, pas zgjedhjeve të 28 dhjetorit. Edhe Edward P. Joseph, ligjërues në Universitetin Johns Hopkins në SHBA dhe ekspert i menaxhimit të konflikteve, ka thënë se ndonëse asnjë aktor i vetëm nuk është plotësisht përgjegjës për tensionet dhe dobësitë e vazhdueshme në Ballkanin Perëndimor, “Serbia duhet të pranojë rendin perëndimor për rajonin”.
Edhe
Pas njohjeve të reja për Kosovën, Serbia “mobilizohet” për “çnjohje”
Ai ka thënë se ka ardhur koha që SHBA-ja të jetë më e vendosur në orientimin e Beogradit drejt një zgjedhjeje përfundimtare strategjike, duke shtuar se rruga euroatlantike është zgjedhja e vetme racionale për Serbinë, e cila, sipas tij, nuk duhet të bëhet Bjellorusia e Ballkanit.
Joseph ka akuzuar administratën amerikane për qëndrim të pabalancuar në raportin Kosovë-Serbi. Ai ka thënë se vetëm Kosova po mbahet përgjegjëse, teksa ka kujtuar sulmin terrorist në Banjskë.
Joseph ka thënë se SHBA-ja duhet ta vazhdojë mbështetjen ekonomike e ushtarake për Kosovën. Por, sipas tij, ndihma më e mirë do të ishte anëtarësimi i Kosovës në NATO. Ai ka thënë se anëtarësimi i Kosovës në NATO do të zgjidhte ngërçin. Madje sipas tij kjo do të zbehte edhe fushatën e çnjohjeve nga Serbia.
“Vetëm rruga drejt NATO-s do t’i jepte fund ngërçit, sepse Serbia s’do të kishte opsione të tjera. Fushata e çnjohjeve dhe varësia nga Rusia dhe Kina do të ishin të pavlefshme sepse anëtarësimi në NATO është shumë më i rëndësishëm se anëtarësimi në OKB”, ka thënë ai.
Pos Josephit, edhe Max Primorac, bashkëpunëtor në qendrën “Margaret Thatcer për Liri”, për Evropë, Lindjen e Mesme, Afrikë e Amerikë Latine, ka thënë se Kosova duhet të mbështetet nga SHBA-ja. Ai ka lavdëruar Kosovën për qasjen properëndimore teksa ka thënë se e ka lëvizur edhe ambasadën drejt Jerusalemit, siç i ka premtuar Trumpit.
“Çfarëdo marrëveshje edhe me Serbinë duhet ta përfshijë njohjen. Por Presidenti Trump duhet ta zgjerojë arritjen e marrëveshjeve në Ballkan me fokus në energji dhe tregti. Por në mënyrë që këto marrëveshje të jetësohen administrata aktuale duhet që sa më shpejt t’i emërojë ambasadorët e rinj atje”, tha Primorac.
Thirrje për largim të Serbisë nga orbita e Rusisë ka bërë edhe Luke Coffey nga Hudson Institute.
Edhe
Self: Pas zgjedhjeve, Serbia ta njohë sovranitetin e Kosovës
Të tre kanë thënë se SHBA-ja duhet të bëjë presion që Serbia të ndalë pengesat për pranimin e Kosovës në organizata ndërkombëtare. Ata po ashtu kanë thënë se Serbia po pasivizon padrejtësisht adresat e shqiptarëve në Luginë e se po shkel të drejtën e gjuhës shqipe në institucionet e Serbisë.
Kosova njihet nga 120 shtete. Njohja e fundit erdhi në fund të tetorit nga Siria.
