-
Nga:
Fitim Gashi
- 22 shtator 2021 21:07
- Shpërndaje në:
Furnizimeve me ushqim i janë shtuar edhe drunjtë për ndezjen e zjarrit në ditën e tretë të protestës së serbëve kundër reciprocitetit me targa.
Rreth tri kilometra është i gjatë vargu i mjeteve të transportit me të cilat është bllokuar rruga që shpie drejt pikës kufitare në Jarinjë.
Skaj rrugës janë vendosur protestuesit të ndarë në disa grupe.
Ftohja e motit kishte bërë që ngrohjen ta bëjnë pranë zjarrit e me alkool. Të shumta i kanë edhe furnizimet me ushqime.
Në disa qoshe kanë ngritur edhe tenda, në të cilat futen kur fillon të bjerë shi.
Edhe
Rruga mbetet e bllokuar, Serbia lëviz ushtrinë përreth kufirit
Protestuesit refuzojnë të deklarohen për mediat shqiptare, por prapa kamerës tregojnë synimet që kanë.
"Po protestojmë kundër lojës së Qeverisë në Prishtinë. Nuk e di sa do të qëndrojmë, ta shohim sa ka nevojë", tha njëri prej protestuesve.
E një tjetër shprehet se kjo situatë nuk i konvenon askujt.
"Çfarë të bëjmë. Vetëm mos të ketë probleme. Kjo është me rëndësi. Kjo situatë nuk është mirë për askënd", thotë një protestues tjetër nga Komuna e Leposaviqit.
Baneri me logon ku urohet mirëseardhje në Asociacionin e vetëshpallur nga veriorët ndan protestuesit nga pika ku janë të vendosur pjesëtarët e Njësisë Speciale të Kosovës.
Është ora 12 e 30 dhe pjesëtarët e njësisë elite bëhen gati për ta bërë ndërresën. Rreshtohen për një në pritje të urdhrit nga komandanti për t’u nisur rrugës e mes protestuesve. E komandanti koordinohet me homologun që është nisur me pjesëtarët e tij në pikën e vëzhgimit. Kur bashkohen dy njësitë përshëndeten mes vete.
Edhe
Situata te protestuesit në Jarinjë vazhdon të jetë e qetë
"A jeni lodh si kaluat...Rruga mbarë", është diskutimi i vetëm mes policëve. Ata janë të pajisur me pushkë të gjata e snajperë.
Pjesë e marshit janë edhe zjarrfikësit e Kosovës, të cilët qëndrojnë gjatë tërë kohës pranë pikës së kufirit. Po ashtu edhe ambulanca.
Në orët e pasdites policët i vizitoi zëvendëskomandanti i rajonit në veri, Besim Hoti. Pasi zhvillon një bisedë të shkurtër me policët ai largohet. Pranë protestuesve e policëve kanë qëndruar edhe policë të EULEX-it.
Me dylbi policia kohë pas kohe vëzhgonte përreth malit. Për një moment pati dyshime se dikush po lëvizte në pjesën lart. Policët mobilizohen dhe fillojnë komunikimin mes tyre.
Në pjesën e sipërme të malit, kah territori i Serbisë, shfaqen dy persona që po ashtu vëzhgojnë poshtë me dylbi. Pas disa minutash ata largohen. Ndërkohë në orët e pasdites serbët kanë tentuar të fusin përforcime me makina shtesë të rënda drejt Jarinjës. Disa prej tyre kanë qenë të mbushura edhe me zhavorr. Por policia nuk i la lejuar të vazhdonin rrugën.
Të shumta kanë qenë lëvizjet e qytetarëve serbë joprotestues, të cilët duhej ta bënin në këmbë rrugën deri në kufi, drejt Kosovës e Serbisë.
Edhe
Pikat kufitare me Serbinë, të bllokuara edhe në ditën e gjashtë
Një qytetar serb nga Zveçani, që nuk deshi të identifikohej e as të fliste para kamerës, tha se protesta është e drejtë, që duhet ushtruar, porse ai ka angazhime për të cilat duhet të shkojë në Serbi. Me vete i kishte edhe fëmijët.
Kjo është dita e tretë e protestës së serbëve pas vendimit të Qeverisë së Kosovës për zbatimin e reciprocitetit në targa.
