Avokati Naim Rudari, dikur pjesëtar i Policisë së Kosovës, ka deklaruar se deklarimet e Qeverisë për pagën dhe shtesat e Njësitit Special Intervenues (NJSI) janë skandaloze, duke u shprehur se ato është dashur të bëhen me sqarime.
Sipas Rudarit, Qeveria është dashur t’i shqyrtojë shtesat për policinë, derisa ka theksuar se komunikimi duhet të jetë i detyrueshëm për zgjidhjen e mospajtimeve.
“Klima e krijuar s’është e këndshme për të gjithë qytetarët, e hiç më pak për Policinë e Ministrinë. Qeveria duhet të bashkëpunojë në vazhdimësi, por është e çuditshme se me rastin e prezantimit të shtesave për rrezikshmëri, ato kishin nevojë për zbërthim. Qeveria në vend që të arsyetojë në forma të tjera atë rrezikshmëri që llogaritet. Lëshuan disa deklarime që për mua ishin skandaloze sepse kanë mundur të arsyetojnë rritjen e assesi të lëshojnë deklarime të tilla të pavenda dhe të pavërteta”, ka deklaruar Rudari të enjten në "60 Minuta" të KTV-së.
Avokati ka theksuar tutje se zyrtarët policorë që i kanë marrë mbi 2.000 euro, i kanë siguruar nëpërmjet pagës dhe orëve shtesë në punë.
“S’ka zyrtar policor që merr pagë 2.200 euro. Ka zyrtar policor që ka punuar mbi 580 orë jashtë orarit të punës. Ata kanë punuar rreth 600 orë. Polici është detyruar të punojë e ka rastisur të marrë atë shumë...Policia ka pagën fikse, por ka ndonjë orë shtesë...Policia ka shumë njësi që kanë rrezikshmëri të lartë e për ata s’po flitet fare”, është shprehur ai.
Rudari ka potencuar tutje se Qeveria e Kosovës duhet t’u ofrojë kushte pune policisë, e të mos “gjuajë me deklarime bombastike”.
"S’e besoj që ka ndikime politike protesta e djeshme... Në 2008-n policia ka hyrë në grevë dhe ka kërkuar realizim të të drejtave. Tash është bërë bujë e madhe dhe po merremi të gjithë me ta... Dje kam kontaktuar me disa zyrtarë të policisë hetuese që thonë se me lehtë shkojnë para çfarëdo niveli të rrezikut, sesa në veprimin e djeshëm para Qeverisë”, ka thënë ai.