Reuters raporton për kërkesën e Amerikës ndaj Shqipërisë për të kapur “peshqit e mëdhenj”

Agjencia e lajmeve Reuters ka raportuar për kërkesën e Shteteve të Bashkuara të Amerikës bërë të hënën aleatit të tyre të NATO-s, Shqipërisë, që të nisin burgosjen e bosëve të krimit të organizuar nëse shpreson të bëjë hap të madh drejt anëtarësimit në BE.

Ambasadori amerikan Donald Lu ka thënë se luftimi i krimit të organizuar dhe korrupsionit ka qenë “sfida më e madhe dhe më e vështirë para” shtetit ish-komunist, i cili është bërë vend kandidat për BE më 2014 dhe shpreson t’i nis bisedimet së shpejti, transmeton Koha.net.

“Derisa të mos arrestohen, ndiqen dhe të shkojnë në burg peshqit e mëdhenj, kanabisi do të kthehet, gjykatësit do të korruptohen, dhe zyrtarët qeveritarë do të jenë të korruptuar”, ka thënë Lu para gjykatësve dhe magjistratëve në ardhje.

Duke cituar raportet amerikane, Lu e ka përshkruar Shqipërisë si “qendër e aktivitetit të krimit të organizuar, që përfshin trafikimin e drogës, armëve dhe prostitucionit”.

Ai tha se katër klane të mëdha në Shqipëri kontrollojnë 20 familje të përfshira në një varg aktivitetesh kriminale.