Kryeakademikja Justina Shiroka-Pula është zgjedhur presidente e Republikës së Kosovës me 81 vota për në seancën e nisur më 6 tetor në raundin e parë të votimit. Votimi përfundoi tre minuta pas mesnatës, ndërsa numërimi përfundoi rreth 15 minuta pas mesnatës. Në mëngjes kanë nisur urimet për zgjedhjen e saj presidente.
Presidentja e Sllovenisë uron Shiroka-Pulën: Pres bashkëpunim konstruktiv
Presidentja e Sllovenisë, Natasha Pirc Musar, e ka uruar Justina Shiroka-Pulën për zgjedhjen e saj presidente.
Përmes një postimi në platformën X, Pirc Musar ka thënë se është e gatshme për bashkëpunim të mirë dhe konstruktiv ndërmjet Sllovenisë dhe Kosovës, si në nivelin bilateral ashtu edhe në kuadër të Procesit Brdo-Brioni.
“Urimet e mia të sinqerta për Justina Shiroka Pulën për zgjedhjen e saj presidente e Republikës së Kosovës. Pres me padurim bashkëpunim të mirë dhe konstruktiv ndërmjet Sllovenisë dhe Kosovës, si në nivelin bilateral, ashtu edhe në kuadër të Procesit Brdo-Brioni. Ju uroj çdo sukses në mandatin tuaj të rëndësishëm”, ka shkruar ajo.
Kryeakademikja Justina Shiroka-Pula është zgjedhur presidente e Republikës së Kosovës me 81 vota për në seancën e nisur më 6 tetor në raundin e parë të votimit.
Ambasadori i Gjermanisë uron Shiroka-Pulën: Pres të punoj me ju për agjendën evropiane
Ambasadori i Gjermanisë në Kosovë, Rainer Rudolph e ka uruar Justina Shiroka-Pulën për marrjen e postit të presidentes.
Ne letrën e tij drejtuar presidentes, ai ka thënë se Gjermania dhe Kosova gëzojnë partneritet të fortë dhe të qëndrueshëm.
Ai ka thënë se mezi presin të punojnë bashkë për të çuar përpara agjendën evropiane të Kosovës.
“Gjermania dhe Kosova gëzojnë një partneritet të fortë dhe të qëndrueshëm. Ky bashkëpunim i ngushtë ka luajtur një rol kyç në promovimin e stabilitetit dhe zhvillimit në rajon. Mezi pres të punoj me ju për të çuar përpara agjendën evropiane të Kosovës”, thuhet në letrën e urimit.
Ambasadori britanik uron Justina Shiroka-Pulën: Pres të punoj me institucionet e Kosovës
Ambasadori i Mbretërisë së Bashkuar në Kosovë, Jonathan Hargreaves, ka uruar Justina Shiroka-Pulën për zgjedhjen e saj në postin e Presidentes së Republikës së Kosovës.
Përmes një postimi, Hargreaves i ka uruar presidentes së re sukses në detyrën e saj, duke theksuar rëndësinë e këtij posti.
“Urimet e mia të përzemërta për Justina Shiroka-Pulën për zgjedhjen e saj Presidente e Republikës së Kosovës. I uroj çdo sukses në këtë rol të rëndësishëm”, ka shkruar ambasadori britanik.
Hargreaves ka thënë se pret të punojë me Shiroka-Pulën dhe të gjitha institucionet e Kosovës për thellimin e partneritetit mes Mbretërisë së Bashkuar dhe Kosovës.
“Pres me kënaqësi të punoj me Presidenten dhe të gjitha institucionet e Kosovës për ta thelluar partneritetin tonë të kahershëm, ndërsa Kosova ecën drejt një të ardhmeje shumëetnike, demokratike dhe euroatlantike”, ka deklaruar ai.
BE-ja mirëpret zgjedhjen e Shiroka-Pulës: Kosova ka punë të rëndësishme përpara
Bashkimi Evropian ka mirëpritur zgjedhjen e Justina Shiroka Pulës në postin e Presidentes së Kosovës, duke shprehur pritjen për rikthimin e stabilitetit institucional në vend.
Në një përgjigje të një zëdhënësi të BE-së, thuhet se stabiliteti i ri institucional do t’i mundësojë Kosovës të avancojë në rrugën e saj evropiane dhe të shfrytëzojë mundësitë që ofron Bashkimi Evropian.
“Ne e mirëpresim zgjedhjen e Presidentes Justina Shiroka Pula dhe presim me padurim rivendosjen e stabilitetit institucional, duke i mundësuar Kosovës të avancojë në rrugën e saj evropiane dhe të shfrytëzojë plotësisht mundësitë që ofron BE-ja”, thuhet në përgjigje.
Zëdhënësi i BE-së ka theksuar se Kosova ka përpara punë të rëndësishme, përfshirë reformat që lidhen me Planin e Rritjes dhe Reformave, zbatimin e Marrëveshjes së Stabilizim-Asociimit, si dhe përparimin në bashkëpunimin rajonal dhe integrimin gradual në Tregun e Vetëm të BE-së.
Zemaj: Vetëm nga LDK-ja kërkohej president konsensual?
Deputeti i Lidhjes Demokratike të Kosovës, Armend Zemaj ka thënë se votimi i Justina Shiroka-Pulës nga ana e Lëvizjes Vetëvendosje tregon se qenka i pranueshëm një president politik porse një gjë e tillë nuk lejohej për LDK-në.
Sipas Zemajt edhe vota e VV-së për ndryshimet në Ligjin për Dhomat e Specializuara tregon se kjo parti e ka pranuar ekzistencën e Gjykatës Speciale.
“Dhe dje u shpalosën qartë dy të vërteta politike. E para: për VV-në mund të jetë i pranueshëm një president politik që vjen nga PDK-ja, por jo një president politik që vjen nga LDK-ja. Vetëm nga LDK kërkohej konsensual?? E dyta: VV votoi për ndryshimet në Ligjin për Dhomat e Specializuara dhe Zyrën e Prokurorit të Specializuar, pra, në praktikë, pranoi edhe vetë ekzistencën dhe juridiksionin e Gjykatës Speciale në Hagë”, ka thënë Zemaj në një postim në Facebook.
Ambasadori i BE-së uron presidenten e re: Mbështetja jonë mbetet e palëkundur
Ambasadori i Bashkimit Evropian në Kosovë, Dirk Schuebel, ka uruar presidenten e re Justina Shiroka-Pula, pas zgjedhjes së saj në këtë post.
Schuebel i ka shprehur urimet e tij Shiroka-Pulës, duke theksuar rëndësinë e rikthimit të stabilitetit politik dhe institucional në Kosovë.
“Me shpresën për ripërtëritjen e stabilitetit politik dhe institucional, pres me kënaqësi të punoj me Presidenten Shiroka Pula, institucionet e Kosovës dhe spektrin e gjerë politik për ta afruar vendin më pranë Bashkimit Evropian”, ka deklaruar Schuebel.
Ai ka theksuar se mbështetja e Bashkimit Evropian për Kosovën do të vazhdojë të jetë e palëkundur.
Kryeakademikja Justina Shiroka-Pula është zgjedhur presidente e Republikës së Kosovës me 81 vota për në seancën e nisur më 6 tetor në raundin e parë të votimit.
Votimi përfundoi tre minuta pas mesnatës, ndërsa numërimi përfundoi rreth 15 minuta pas mesnatës.
Çitaku: Kuvendi nderoi UÇK-në me ligjin për Specialen dhe zgjedhjen e presidentes
Deputetja e Partisë Demokratike të Kosovës, Vlora Çitaku, ka deklaruar se Kuvendi i Kosovës, përmes dy vendimeve të marra mbrëmë, ka nderuar Ushtrinë Çlirimtare të Kosovës, institucionin dhe shtetin.
Përmes një postimi në Facebook, Çitaku ka thënë se Kosova tashmë ka një ligj që, sipas saj, mbron UÇK-në, si dhe një presidente të re, Justina Pula-Shirokën.
“Mbrëmë, me dy vendime, Kuvendi i Kosovës nderoi UÇK-në, vetveten dhe shtetin”, ka shkruar Çitaku.
Ajo e ka cilësuar presidenten e re si “një zonjë të dashur e të nderuar”, me të cilën, siç ka thënë, e lidhin vite bashkëpunimi dhe miqësie.
Çitaku ka vlerësuar gjithashtu se në këto zhvillime ka triumfuar edhe zëri i qytetarëve, duke theksuar se ai zë “nuk u ndal dhe u bë obligim për institucionet”.
“UÇK-ja na bashkoi sërish. Le të na mbajë të bashkuar rreth historisë së lavdishme të vendit tonë, deri në drejtësi dhe liri për çlirimtarët”, ka shkruar ajo.
Deputetja e PDK-së ka thënë se këto vendime përbëjnë një kthesë të rëndësishme dhe të shumëpritur, ndërsa ka bërë thirrje që angazhimi institucional të vazhdojë në mbështetje të betejës për drejtësi në Apel.
Në fund, Çitaku ka deklaruar se këtë “fitore të shtetit të Kosovës” ua dedikon ish-presidentit Hashim Thaçi dhe ish-krerëve të tjerë të UÇK-së, Kadri Veselit, Jakup Krasniqit dhe Rexhep Selimit.
“Një mesazh për ta: Kosova është pranë jush. Urime, Kosovë! Me UÇK-në në zemër!”, ka përfunduar Çitaku.
Hamza: Nata e mbrëmshme të jetë kthesë drejt rrugës së mbarë për shtetin
Bedri Hamza, kryetar i Partisë Demokratike të Kosovës, ka shprehur besimin që e marta Kosovës do t’i kthehet rruga e mbarë.
Pas dakordimit të PDK-së dhe Vetëvendosjes, të martën Justina Shiroka-Pula u zgjodh presidente pak pasi u miratuan në lexim të dytë ndryshimet në Ligjin për Specialen.
“Nata e mbrëmshme ishte një natë e gjatë për Republikën e Kosovës. Por dua të besoj se do të jetë edhe një kthesë drejt rrugës së mbarë për shtetin tonë dhe, bashkë me shtetin e me Presidenten e re, edhe për ish-udhëheqësit e UÇK-së, në betejën tonë të përbashkët për drejtësinë, të vërtetën dhe pastërtinë e luftës sonë çlirimtare. Beteja për drejtësi në Hagë nuk mund të bëhet më vetëm nga individët, familjet, dashamirët dhe mbrojtësit e tyre, të cilët tash e gati gjashtë vjet po e bartin mbi supet e tyre peshën e rëndë të këtij procesi. Shteti ynë tani duhet të jetë pranë tyre, me të gjitha kapacitetet dhe përgjegjësitë që i takojnë”, ka shkruar Hamza në Facebook.
Ai ka thënë protestuesit në shesh, për 20 ditë pas vendimit të Gjykatës Speciale ndaj udhëheqësve të Ushtrisë Çlirimtare të Kosovës, u bënë pjesë e rëndësishme e procesit.
“Qytetarëve tanë dhe brezave që vijnë u duhet një Kosovë që nuk harron, një shtet që nuk dorëzohet dhe një shoqëri që e mbron të vërtetën e saj. Atyre u duhet një Kosovë që nuk lejon që sakrifica dhe lufta për liri të zbehen nga harresa apo të shtrembërohen nga paragjykimet. Tani kemi një Deklaratë të Përbashkët të zotimit dhe vullnetit politik në Kuvend, një ligj për mbrojtjen e UÇK-së dhe kemi Presidenten e zgjedhur. Prandaj, pa përjashtim, presim koordinimin, bashkëpunimin dhe mbështetjen e të gjithëve për këtë kauzë kombëtare. UÇK-ja na bashkoi në një vizion. Tani është koha që atë vizion ta shndërrojmë në një mision të përbashkët, me angazhim dhe vepra konkrete. Beteja jonë për drejtësi duhet të vazhdojë. Dhe në këtë betejë, çlirimtarët tanë nuk do të jenë vetëm. Duhet të jemi të gjithë bashkë!” ka shkruar tutje ai.
Haxhiu uron Shiroka-Pulën: U përmbyll një proces i gjatë
Kryetarja e Kuvendit të Kosovës, Albulena Haxhiu e ka uruar presidenten e re, akademiken Justina Shiroka Pula për marrjen e detyrës së re.
Haxhiu, i ka uruar shefes së shtetit mbarësi në ushtrimin e detyrës, në shërbim të vendit dhe qytetarëve.
“Uroj Presidenten e re të Republikës së Kosovës, akademiken Justina Shiroka Pula, dhe i dëshiroj shumë mbarësi në ushtrimin e detyrës së saj, në shërbim të vendit dhe të të gjithë qytetarëve”, ka shkruar Haxhiu.
Haxhiu, në këtë urim ka vlerësuar që Kuvendi ka përmbyllur një proces të gjatë duke gjetur ujdi institucionale.
“Kuvendi i Republikës së Kosovës përmbylli një proces të gjatë dhe të vështirë politik, duke arritur marrëveshje dhe duke gjetur zgjidhje institucionale”, ka thënë ajo.
Poashtu Haxhiu ka thënë që ushtrimi i detyrës së Presidentes së Kosovës ka qenë nder i madh për të.
“Për mua ka qenë një nder i veçantë të ushtroj detyrën e Presidentes së Republikës së Kosovës në një periudhë me përgjegjësi të mëdha institucionale. Këtë detyrë e kam ushtruar me respekt të plotë për institucionin dhe me përkushtim, duke u angazhuar që të ruhet vazhdimësia e funksionimit të shtetit deri në zgjedhjen e Presidentes së re”, ka deklaruar Haxhiu.
Rama uron Shiroka-Pulën: Zgjedhja e saj u bë në kohë sfiduese
Kryeministri i Shqipërisë, Edi Rama, ka uruar zgjedhjen e Justina Shiroka-Pulës në pozitën e presidentes.
Në një postim në rrjetin social “X” Rama ka thënë se zgjedhja e Shiroka-Pulës ka ardhur në një kohë sfiduese për Kosovën, rajonin dhe vetë Evropën.
“Urime të përzemërta akademikes së mirënjohur, zonjës Justina Shiroka - Pula, për zgjedhjen Presidente e Republikës së Kosovës, në një fazë sfiduese për Kosovën dhe në një kohë sfiduese për krejt rajonin tonë e për vetë Evropën. Mbarësi e sukses për ju dhe Kosovën zonja Presidente”, ka shkruar ai.
Begaj uron Shiroka-Pulën: Shqipëria e Kosovës do të jenë bashkë drejt BE-së
Presidenti i Shqipërisë, Bajram Begaj, ka uruar Justina Shiroka-Pulën për zgjedhjen e saj presidente të Kosovës.
Begaj në urimin e tij ka theksuar rrugëtimin e përbashkët të Kosovës dhe Shqipërisë drejt së ardhmes evropiane.
“Urime të përzemërta znj. Justina Shiroka-Pula për zgjedhjen Presidente e Republikës së Kosovës! Në çdo sfidë dhe në çdo hap drejt së ardhmes evropiane, Shqipëria dhe Kosova do të jenë bashkë. Urime Presidente! Zoti e bekoftë Kosovën dhe shqiptarët kudo ku janë!”, ka shkruar Begaj në Facebook.
Kryeakademikja Justina Shiroka-Pula është zgjedhur presidente e Republikës së Kosovës me 81 vota për në seancën e nisur më 6 tetor në raundin e parë të votimit, i cili përfundoi rreth 15 minuta pas mesnatës së 7 tetorit.
Kurti uron zgjedhjen e presidentes: Shumë mund e përpjekje, për kompromisin në fund
Kryeministri i Kosovës, Albin Kurti ka uruar Justina Shiroka-Pula për marrjen e postit të presidentes.
Përmes një postimi në Facebook ka shkruar se Kosova ka presidenten, por edhe ligjin me ndryshime për Dhomat Specializuara, duke shtuar se do të punojnë bashkë për suksesin e ish-krerëve të UÇK-së në Apel.
Kurti tutje ka falënderuar edhe deputetët që kanë marrë pjesë në votimin e presidentes, e po ashtu edhe kryetarin e PDK-së, Bedri Hamza për pranimin e propozimit.
“Falënderoj deputetët pjesëmarrës në votim, sikurse edhe kryetarin Hamza që pranoi propozimin. Shumë mund e përpjekje, për kompromisin në fund. Për Republikën e Kosovës! Urime presidentes së re dhe të gjithë qytetarëve”, ka shkruar ai.
Mes tensionesh nga protestat e vazhdueshme e edhe të përshkallëzuara me thirrjet që të votohen në plotëni ndryshimet në Ligjin për Specialen, dhe nën presionin e orës që shënonte përfundimin e datës 6 tetor, si afat i fundit për zgjedhjen e presidentit, deputetët e Kuvendit të Kosovës, kanë votuar Justina Shiroka-Pulën, presidente të Republikës së Kosovës.
Ajo u zgjodh presidente me 81 vota për.