Rama në Berlin kërkon heqjen e vizave për Kosovën

Kryeministri i Shqipërisë Edi Rama gjatë konferencës të përbashkët për media me kancelarin gjerman Olaf Scholz tregoi disa nga temat e diskutuara.

Rama tha se ka kërkuar nga Gjermania që të liberalizohen vizat për Kosovën.

“Gjermania të bëjë pjesën e saj dhe të përmbushë kërkesën për liberalizimin e vizave për Kosovën. Është proces i bllokuar dhe shpresojmë që të gjitha vendet e Ballkanit të marrim atë që meritojnë në raport me ecurinë e tyre drejt BE-së”, tha Rama.

Kryeministri i Shqipërisë tha se Ballkani i Hapur është rivitalizim i Procesit të Berlinit.

“Jam shumë i inkurajuar nga biseda me kancelarin sepse gjeta një gatishmëri inkurajuese të tij dhe të Gjermanisë për të shtyrë me më shumë vendosmëri procesin e integrimit evropian të Ballkanit Perëndimor, duke filluar nga përmbysja e një faze të procesit për Shqipërinë dhe Maqedoninë e Veriut që shpresojmë të ndodhë në qershor. E çmojmë shumë konsideratën e qeverisë federale për progresin që ne kemi bërë por jemi edhe të vetëdijshëm që kemi shumë për të bërë në të gjitha drejtimet. Për ne procesi i integrimit evropian nuk është një proces për të shkuar në Evropë por për të ndërtuar një Shqipëri me standarde e BE-së, dhe këtë ia detyrojmë fëmijëve tanë”, tha Rama. “Unë e informova Kancelarin edhe për “Ballkanin e Hapur” që nuk është gjë tjetër vetëm një përpjekje për ta jetësuar Procesin e Berlinit. Shpresoj që Gjermania të bëjë pjesën e saj sa i përket përmbushjes së procesit dhe bashkimit nga BE për uljen në tryezë të negociatave për Shqipërinë dhe Maqedoninë e Veriut. Po e bëj një ftesë publikisht do të ishim të nderuar që të vizitoni Shqipërinë dhe Rajonin. BE ka nevojë për Rajonin dhe Rajoni për BE.”, tha Rama.

Rama flet për ndikimin ruso-kinez në rajon pas blerjes së armëve nga Serbia

Kryeministri i Shqipërisë, Edi Rama ka folur rreth ndikimeve në Ballkan pas blerjes së armatimit të Serbisë nga Kina.

Rama tha se nuk duhet të ketë shqetësime nga vendet e treta në rajon ndonëse e pranoi se ndikimi i Rusisë përbën një problem.

“Sigurisht, ndikimi i Rusisë në rajonin tonë përbën një problem, por më tepër në kushtet e sotme çka e bën shumë të nevojshme aktivizimin më intensiv të BE-së për t’i afruar më pranë të gjitha vendet e Ballkanit Perëndimor, ndërkohë që Kina është një vend ka synimin e vet të deklaruar për të gjithë ish-Evropën Lindore, ka një format special 17 plus 1 me të gjitha vendet komuniste, që është një projekt investimesh. Shqipëria nuk ka ndonjë marrëdhënie të posaçme me asnjërën dhe niveli i investimeve të Rusisë në Shqipëri është zero, ndërsa Turqia nuk është një akter i tretë dhe ajo është partner strategjik i Shqipërisë”, tha Rama.

Ndryshe, Serbia së fundi ka blerë një sistem raketor kinez duke nxitur kështu reagimin e Prishtinës zyrtare, e cila ka kërkuar nga BE, NATO e OKB që të shikojnë qasjen e tyre në raport me Beogradin.