Qeveria miraton nismën për një marrëveshje me Shqipërinë

Qeveria ka mbajtur të hënën mbledhje elektronike, në të cilën ka miratuar nismën për lidhjen e Marrëveshjes për njohjen e së Drejtës së Ushtrimit të Profesioneve të Avokatit dhe Ndërmjetësit në Zgjidhjen e Mosmarrëveshjeve ndërmjet Qeverisë së Kosovës dhe Këshillit të Ministrave të Shqipërisë.

Kjo u bë e ditur nga Zyra e Kryeministrit, në njoftimin e të cilës thuhet se vendimi e obligon Ministrinë e Drejtësisë në Kosovë të zhvillojë negociata me Shqipërinë për finalizim të tekstit përfundimtar të marrëveshjes.

“Marrëveshja ka si objekt përcaktimin e rregullave të zbatueshme në mundësimin e njohjes së të drejtës së ushtrimit të profesioneve të avokatit dhe ndërmjetësit në zgjidhjen e mosmarrëveshjeve në të dy vendet, si dhe të të drejtave dhe detyrimeve që Palët marrin përsipër për arritjen e qëllimit, sipas kësaj Marrëveshje”, thuhet në njoftim.