Qeveria me 25 milionë euro synon që familjeve të cenueshme t’u bëhet banimi i përballueshëm

Qeveria e Kosovës synon që me 25 milionë euro të krijojë një sistem gjithëpërfshirës të banimit social, që përfshin shndërrimin e ndërtesave ekzistuese në banesa të reja sociale, renovimin e shtëpive të cilat janë në pronësi të familjeve me të ardhura të ulëta si dhe ndërtimin e banesave të reja kolektive sociale.

Kjo është thënë të enjten në një deklaratë për media nga Ministria e Financave, pasi ministri Hekuran Murati dhe guvernatori i Bankës për Zhvillim të Këshillit të Evropës, Carlo Monticelli, nënshkruan marrëveshjen 25-milionëshe.

Marrëveshja ka për synim krijimin e një sistemi gjithëpërfshirës të banimit social.

Projekti ka fokus të veçantë familjet e cenueshme të shoqërisë të cilat kanë të ardhura të ulëta pa zgjidhje banimi. Përmes marrëveshjes parashihet shndërrimi i ndërtesave ekzistuese në banesa të reja sociale dhe të përballueshme, renovimi i shtëpive të cilat janë në pronësi të familjeve me të ardhura të ulëta si dhe ndërtimi i banesave të reja kolektive sociale.

Në ceremoninë e nënshkrimit, Murati është shprehur se “projekti për banimin social do të garantojë akomodimin e dinjitetshëm dhe të përballueshëm për familjet e cenueshme”.

Edhe LAJMET E MBRËMJES 22 gus 2026 Qeveria lanson projektin 37-milionësh që përfshin 773 familje në 21 komuna

Ndërsa, Monticelli ka deklaruar se “kjo iniciativë do të ndihmojë në realizimin e objektivit të përgjithshëm të vendit për krijimin e banimit social gjithëpërfshirës për qytetarët e Kosovës”.

Sipas njoftimit, të dyja palët u pajtuan që të thellojnë bashkëpunimin në mënyrë që qytetarët e Kosovës të kenë akomodim të përballueshëm, efiçient dhe të sigurt.