Qeveria iu premton lehtësira fiskale biznesmenëve të diasporës për investime në Kosovë

Kryeministri i Republikës së Kosovës, Ramush Haradinaj, ka pritur në takim përfaqësuesit e Rrjetit të Bizneseve të Diasporës Shqiptare, të udhëhequr nga kryetari, Nazar Mehmeti, dhe kryetari i nderit, Lazim Destani, si dhe përfaqësues të tjerë të bizneseve nga diaspora të cilët e përgëzuan atë për përgjegjësitë e reja, bëhet e ditur përmes një komunikate për media.

Me këtë rast, Haradinaj i ka përgëzuar përfaqësuesit e Rrjetit të Bizneseve të Diasporës për kontributin e tyre dhënë Kosovës në të gjitha periudhat.

Haradinaj, theksoi përkushtimin e qeverisë për krijimin e lehtësirave fiskale për të gjithë investitorë nga diaspora që dëshirojnë të sjellin investimet e tyre në Kosovë, duke thënë se, “Qeveria do të jetë partnere në punën e tyre dhe në të gjitha sfidat e përbashkëta, si në rend dhe ligj dhe luftën kundër korrupsionit”.

Ndërkaq, Mehmeti shprehu përkushtimin e tyre që maksimalisht të angazhohen në zhvillimin ekonomik të Kosovës.

Po ashtu, Mehmeti tha se, “diaspora shqiptare si gjithherë është e gatshme të ndihmojë shtetin e Kosovës në rrugëtimin e saj drejt integrimeve euro atlantike”.