Këshilltarë të opozitës dhe të partisë në pushtet kanë kërkuar nga ekzekutivi komunal i Podujevës që të publikojë listën e të gjitha pronave komunale. Ata po ashtu kanë kërkuar edhe listën e shfrytëzuesve të këtyre pronave për të parë nëse kanë obligime të pashlyera ndaj Komunës.
Këshilltari Haki Rudari nga Lwvizja Vetwvendosje ka thënë se në të kaluarën ka pasur mjaft raste kur shfrytëzues të pronave komunale edhe pse me borxhe ndaj komunës kanë kërkuar sërish marrjen në shfrytëzim të po atyre pronave komunale.
“Ajo çka kërkoj unë nga dejtoria përkatëse apo drejtoresha është që në të ardhmen të na vije një listë e shfrytëzuesve të pronës komunale për vitet e shkuara. P.sh. në vitin 2021 që ka qenë në pushtet Lëvizja, por edhe në vitet paraprake. Pse po e them këtë? Po e them se kemi pas përvoja kur njerëzi e kanë shfrytëzuar pronën komunale, kanë pas borxhe ndaj pronës komunale dhe prapë kanë kërkuar për të marrë të njëjtën pronë komunale. Dhe kjo për mua është e papranueshme”, është shprehur këshilltari i VV-së, Haki Rudari.
“Prandaj, duke llogaritur transparencën dhe llogaridhënien, unë bazohem edhe në Ligjin për dhënien e pronës publike, neni 4 ku thotë ‘parimet e dhënies së pronës së paluajtshme janë: parimet e ligjshmërisë, parimet e efikasitetit, parimet e transparencës, parimet e ruajtjes dhe garantimit të interesit publik, parimet e ruajtjes dhe rritjes së vlerës së pronës komunale dhe parimet e rrujatjes së mjedisit”, ka shtuar ai.
Sipas tij, ka shumë raste kur kompanitë e ndotin dhe e kanë ndotur mjedisin në të kaluarën edhe është heshtur.
“Prandaj, në këtë drejtim kërkoj që të ardhmen të na sillet edhe një listë e shfrytëzuesve të pronës komunale nga x-pronarët apo x-kompanitë, në mënyrë që të shohim se cilat janë obligimet ndaj komunës, a i kanë kryer obligimet apo kanë borxhe”, ka theksuar Rudari.
Edhe këshilltari nga radhët e LDK-së, Naim Çunaku, ka thënë se përveç shfrytëzuesve duhet të publikohet lista me të gjitha pronat komunale.
“Është e vërtetë e madhe se si çdo komunë, edhe komuna jonë ka pas probleme me pronat komunale. Kur them probleme, problemet që mund të dalin nga pronat janë te shfrytëzuesit jokompetentë dhe një nga detyrat e një komune është që të kujdeset për pronën e saj. Një prej kushteve më elementare të një qeverisje të mirë është transparenca. Jemi disa nga ne dëshmitarë që në vazhdimësi kam kërkua që pronat komunale të jenë publike për çdo qytetar të Republikës që do me i pa”, ka thënë Naim Çunaku.
Sipas tij, shumë prej komunave të Kosovës i kanë në ueb-faqe të komunave të gjitha pronat komunale, qofshin ato të shfrytëzuara me autorizim apo pa autorizim.
“Por, prona komunale duhet të jetë e shenjëzuar si pronë komunale. Unë kërkoj që të gjitha pronat e komunës të vihen në ueb-faqen e komunës”.
Në seancën e fundit të Kuvendit Komunal të Podujevës është miratuar listae veçantë e pronave të paluajtshme komunale për dhënie në shfrytëzim gjatë vitit 2022. Drejtoresha për Pronë, Kadastër dhe Gjeodezi, Bahrije Mehmeti, ka thënë se për shkak të mbjatjes së zgjedhjeve lokale më 17 tetor 2021, komunave u është pamundësua publikimi i listave të veçanta të pronave komunale. Prandaj, sipas saj, Ministria ua ka mundësuar afatin shtesë deri më 31 mars 2022.
“Ju propozoj që të miratoni këtë listë të veçantë të pronave për dhënie në shfrytëzim sipas legjislacionit dhe rregulloreve në fuqi, pasi që konsiderojmë se kjo është në të mirë të qytetarëve dhe në të mirë të komunsë tonë. Përmes votës tuaj t’ua mundësojmë qytetarëve që në mënyrë të ligjshme dhe transparente ta marrin pronën komunale në shfrytëzim”, u ka thënë këshilltarëve komunale, Bahrije Mehmeti.
Ilir Koprani nga LDK ka thënë se për shkak se miratimi i listës së veçantë të pronave komunale për dhënie në shfrytëzim është e rëndësisë së veçantë dhe pasi drejtoresha është zotuar se deri më 31 mars do të publikojë listën e të gjitha pronave, Grupi i LDK-së e përkrahë këtë pikë.
Ndërsa, shefi i Grupit të këshilltarëve të LVV-së, Florent Hasani, ka kërkuar që ky proces të zhvillohet sipas legjislacionit në fuqi.
“Grupi i VV-së duke e dikur rëndësinë dhe interesin për përfitime publike dhe zhvillimin ekonomik të komunës e mbështet listën e veçantë për dhënien në shfyrtëzim të pronës së paluajtshme të komunës. Megjithatë, kërkojmë që ky proces të zhvillohet në përputhje të plotë me Ligjin për vetëqeverisje lokale, duke iu referuar 5 neneve, posaçërisht nenit 2 ku obligohen të përfshihen të dhënat kadastrale, qëllimin e dhënies në shfyrëtzim, destinimin e pronës dhe t’u përmbahen afateve kohore të parapara në nene”, ka thënë ai.
Mbështetje kësaj pike i ka dhënë edhe Grupi i këshilltarëve të PDK-së.