Prokurori i Themelores në Mitrovicë kërcënohet gjatë seancës, reagon Kryeprokurori i Shtetit

Zyra e Kryeprokurorit të Shtetit e ka dënuar ashpër kërcënimin që thotë se iu bë prokurorit të Prokurorisë Themelore në Mitrovicë, Muharrem Prekazi, gjatë zhvillimit të një seance gjyqësore.

Zyra e Kryeprokurorit përmes një komunikate ka njoftuar se lidhur me rastin menjëherë janë ndërmarrë të gjitha veprimet e nevojshme ligjore ndaj personit përgjegjës, në mënyrë që ai të përballet me drejtësinë dhe të marrë dënimin e merituar.

“Çdo tentativë për të frikësuar apo penguar prokurorët e shtetit në ushtrimin e detyrës së tyre zyrtare është e papranueshme dhe nuk do të tolerohet në asnjë formë”, thuhet në komunikatë.

Ndërkohë, Zyra e Kryeprokurorit të Shtetit ka shprehur mbështetjen institucionale për prokurorin Prekazi, si dhe për të gjithë prokurorët e shtetit.