Komuna e Mitrovicës në pritje të erërave të forta, kërkon kujdes të shtuar

Edhe komuna e Mitrovicës u ka bërë thirrje qytetarëve të premten të tregojnë kujdes të shtuar gjatë orëve në vijim, për shkak të paralajmërimeve meteorologjike për erëra të forta.

Përmes një njoftimi, komuna ka bërë të ditur se po i përcjell nga afër zhvillimet meteorologjike dhe paralajmërimet për përkeqësimin e mundshëm të situatës.

Sipas njoftimit, deri më tani në territorin e Mitrovicës nuk është evidentuar asnjë rast apo dëm i shkaktuar nga erërat e forta.

“Duke përcjellë zhvillimet meteorologjike dhe paralajmërimet për erëra të forta, Komuna e Mitrovicës u bën thirrje të gjithë qytetarëve që të tregojnë kujdes të shtuar gjatë orëve në vijim. Edhe pse deri më tani në territorin e Komunës së Mitrovicës nuk është evidentuar ndonjë rast apo dëm i shkaktuar nga erërat e forta, mundësia e intensifikimit të tyre kërkon kujdes dhe masa parandaluese”, thuhet në njoftim.