Qeveria e Kosovës ka miratuar kërkesën e Këshillit Prokurorial për shtesat e prokurorëve të Prokurorisë Speciale dhe për kryeprokurorin e kësaj prokurorie, Reshat Millaku, raporton KTV.
Sipas këtij vendimi, prokurorët do të marrin shtesë nga 400 euro, ndërsa kryeprokurori 500 euro. Por, shoqëria civile këtë vendim e konsideron të jashtëligjshëm dhe ndërhyrje politike në sistemin prokurorial.
Mbi 66 mijë euro pagesa shtesë për vitin 2018 do të marrin prokurorët e Prokurorisë Speciale.
Qeveria e Kosovës të martën ka marrë vendim që prokurorët Specialë të marrin pagë shtesë nga 400 euro, ndërsa kryeprokurori i kësaj prokurorie 500 euro.
Por, ky vendim i Qeverisë Haradinaj është cilësuar si precedent i rrezikshëm dhe ndërhyrje në sistemin e drejtësisë.
Për më tepër, sipas tyre, ky vendim është i kundërligjshëm pasi bazuar në legjislacionin në fuqi, Kuvendi është ai që e ka kompetencën për përcaktimin e pagës, sipas propozimit të Këshillit Prokurorial, e jo Qeveria.
Megjithatë, ndryshe mendon kryesuesi i Këshillit Prokurorial të Kosovës.
Edhe
Qeveria miraton shtesat për prokurorët specialë dhe për Lumezin
Blerim Isufaj insiston se shtesat janë stimulim për punën e prokurorëve në luftimin e korrupsionit.
Kryeministri Ramush Haradinaj dhe ministri i Drejtësisë, Abelard Tahiri, kanë thënë se ky vendim nuk është i ri, pasi në vitet e kaluara pagesa shtesë ka qenë 800 euro për prokurorët e Prokurorisë Speciale.
Sipas ministrit Tahiri, ky është vendim i ri që paraqet ulje të pagesës shtesë për 400 euro.
