Procesi i ristrukturimit në Ministrinë e Mjedisit shpallet i jashtëligjshëm

Këshilli i Pavarur Mbikëqyrës për Shërbyesit Civilë i ka anuluar ristrukturimet në Ministrinë e Mjedisit, duke i shpallur të paligjshme. Vendimi u mor pasi u konstatua se ndryshimet në përshkrimet e punës ishin bërë nga ushtrues detyre i Sekretarit të Përgjithshëm, jashtë afateve ligjore. Burime të KOHËS thonë se rreth 100 zyrtarë rezulton të jenë prekur nga ky proces

Këshilli i Pavarur Mbikëqyrës për Shërbyesit Civilë i ka shfuqizuar të gjitha ndryshimet dhe ristrukturimet e bëra në Ministrinë e Mjedisit, Planifikimit Hapësinor dhe Infrastrukturës (MMPHI), duke i konsideruar ato të paligjshme.

Në vendimin e fundit, KPMSHCK-ja ka konstatuar se përshkrimet e punës, kriteret e kualifikimit dhe detyrat për pozitat brenda ministrisë janë ndryshuar pa një qëllim të qartë dhe legjitim. 

Sipas vendimit, këto ndryshime janë miratuar në periudhën kur pozita e Sekretarit të Përgjithshëm mbahej me ushtrues detyre ose zëvendëssekretar, përtej afateve të përcaktuara në ligj.

“Nisur nga fakti që numër i madh i nëpunësve civilë kanë parashtruar ankesa në KPMSHCK dhe nga trajtimi i tyre Kolegji ka konstatuar se ka shkelje të dispozitave materiale dhe procedurale gjatë ndryshimit dhe plotësimit të përshkrimeve të punës, si gjatë ristrukturimit të punësuarave në MMPHI, Kolegji vendosi që t’i shfuqizojë të gjitha ndryshimet e përshkrimeve të punës të bëra nga Grupi i Vlerësimit për Klasifikimin e Vendeve të Punës në Ministrinë e Mjedisit, Planifikimit Hapësinor dhe Infrastrukturës, si dhe Raporti i Punës dhe Propozimet për ristrukturim në MMPHI të datës 03.03.2025”, thuhet në vendimin e KPMSHCK-së.

Në vendim thuhet se i gjithë procesi i ndryshimit të përshkrimeve të punës dhe raporti i ristrukturimit i datës 3 mars 2025 është zhvilluar në kundërshtim me Ligjin për Zyrtarët Publikë.

“Pas analizimit të shkresave, shihet qartë se DMPZP-ja ka marrë bazë emalin e Ushtruesit të detyrës së Sekretarit të Përgjithshëm në MMPHI për themelimin e komisionin të Ristrukturimit, prandaj këto veprime këtë proces e bëjnë të paligjshëm. Sa u përket këtyre emaliave, pozita e Sekretarit të Përgjithshëm pos që është ushtruar në kundërshtim me nenin 35 të LZP, përmes emailave shihet se kanë marrë kompetenca të cilat i takojnë grupit punues i themeluar me datë 05.04.2024 me Vendimin Nr.2338/24, këtë veprim të paligjshëm sa i përket marrjes së kompetencave e kishte konstatuar Kolegji i Këshillit me vendim A.nr. 598/2025 të datës 26.05.2025”, thuhet në vendim.

Për këtë Kolegji është mbështetur edhe në Aktgjykimin e Gjykatës Supreme të Kosovës të 10 qershorit të këtij viti, e cila kishte vlerësuar se mbajtja e pozitës së Sekretarit të Përgjithshëm përtej afateve ligjore ishte e jashtëligjshme.

KOHA ka një javë që ka kërkuar një qëndrim nga Ministria e Mjedisit lidhur me këtë vendim të Këshillit dhe nëse janë marrë hapa për zbatimin e tij, apo do t’i drejtohen Gjykatës, por nuk ka marrë përgjigje.
Ministria është pyetur edhe për numrin e zyrtarëve të afektuar nga ristrukturimi. KOHA mëson se janë rreth 100 zyrtarë që janë prekur nga ndryshimet e bëra.

Këshilli i ka kthyer në fuqi përshkrimet e mëparshme të punës dhe ka konsideruar se çdo veprim i ndërmarrë gjatë kohës kur posti i sekretarit të Përgjithshëm mbahej jashtëligjshëm është i pavlefshëm.