Pas mbylljes së mediave, Qeveria Rama kritikohet për arbitraritet e cenim të lirisë së informimit

Veprimet e autoriteteve në Shqipëri kanë bërë që media të shumta të mbeten jashtë objekteve ku funksiononin paraprakisht. Përderisa gjykata në Tiranë e ka urdhëruar Qeverinë që t’i lirojë objektet ku funksiononin mediat, ky vendim gjyqësor nuk është zbatuar. Gazetarët dhe përfaqësuesit e mediumeve të prekura nga vendimi e kanë fajësuar Qeverinë e udhëhequr nga Edi Rama për arbitraritet.

10 ditë pasi autoritetet e Shqipërisë ndërhynë në dy objekte të mediumeve dhe ua shkëputën sinjalin e transmetimit, televizioni News 24 i është rikthyer punës.

Megjithatë, tash e 10 ditë që nga ndërhyrja e paparalajmëruar e shtetit, gazetarët dhe drejtuesit e News 24, si dhe të 5 mediumeve të tjera nuk kanë pasur qasje në dy objektet ku kanë funksionuar më herët.

Qeveria e Shqipërisë ka vendosur t’ia japë në pronësi njërin objekt ku operonte News 24 një ndërmarrjeje shtetërore ushtarake KAYO.

E në objektin tjetër ku vepronin disa media të tjera Qeveria ua ka bllokuar qasjen atyre. 

Gazetarëve u janë marrë edhe kompjuterët dhe të gjitha dokumentet që i kishin në redaksi.

Edhe Arbëri 9 gus 2025 Policia bllokon News24 dhe mediat e tjera të “Focus Media Group”

Vendimi gjyqësor për t’i rikthyer ato është shpërfillur, ashtu si vendimi për t’ia rikthyer qasjen në objekte.

Ndërhyrjen e shtetit në redaksitë e mediave gazetari i News 24 Renaldo Salijanji e sheh si arbitraritet të Qeverisë.

“Gjykata ka urdhëruar kompaninë shtetërore KAYO që t’i kthejë të gjitha ato materiale që iu kanë marrë gazetarëve, por ende nuk është bërë kthimi i këtyre materialeve edhe pse këto materiale duhet të ktheheshin brenda 48 orëve, ne sërish nuk i kemi marrë këto materiale. Sa i takon godinës tjetër për të cilën kemi kontratë deri në vitin 2034, ne sërish nuk lejohemi të hyjmë në këtë godinë me argumentin se e gjithë zona rreth godinës është territor ushtarak”, ka thënë ai. 

Salijani thotë se qëllimi ishte të pengohet puna e gazetarëve hulumtues dhe e kritikëve ndaj pushtetit.

 “Nesër mund të jetë radha e një media tjetër dhe kjo i frikëson të gjitha mediat qoftë mediat online apo mediat e shkruara apo vizive që të mund të jenë kritike me qeverinë që të mund t’i investigojnë skandalet e ndryshme që ndodhin në Qeveri apo lidhjet e Qeverisë me krimin dhe do të censurohen, do të vetëcensurohen mediat në mënyrë që të vijojnë punën e tyre pasi e panë se cfarë do të ndodhë nëse do të jesh kritik ndaj Qeverisë”, ka shtuar ai.

Drejtoresha e News 24, thotë se rasti gjyqësor për pronësinë nuk është arsye e mjaftueshme për t’ia shkëputur sinjalin një televizioni e as për t’i mbyllur mediat.

“Do të vazhdojmë të punojmë pa u ndalur, qoftë edhe në këtë studio të improvizuar për të dhënë te shikuesit informacionet më të fundit e të vërteta...Ndërsa pjesa tjetër është rruga ligjore. Të gjitha kallëzimet që zyra ligjore e kompanisë i ka bërë si në gjykatat vendore ashtu edhe ndërkombëtare – me besimin e plotë se do të gjejmë të drejtën tonë për të ushtruar lirinë tonë të informimit të publikut e cila na është privuar padrejtësisht dhe në mënyrë arbitrare”, ka thënë Anila Jole, drejtoreshë e News 24.

Veprimet e autoriteteve të Shqipërisë kanë nxitur reagime të shumta.

Edhe Arbëri 28 qer 2026 Protestuesit në Shqipëri vlerësojnë se janë arritur disa objektiva madhore

Reporterët Pa Kufij e kanë dënuar intervenimin e policisë, duke thënë se e cenon të drejtën e informimit

BE-ja e ka quajtur shqetësues veprimin, e Grupi i Organizatave për Reagim të Shpejtë në reagimin e tyre, vendimin e qeverisë e ka vlerësuar cenim të lirisë së mediave.