Partia Socialiste synon shkarkimin e Ilir Metës

Për të dytën herë brenda një mandati, Partia Socialiste, ka ndërmarrë iniciativën për shkarkimin e presidentit të Shqipërisë, Ilir Meta.

Partia e Edi Ramës ka mbledhur deri më tash rreth 50 nënshkrime të deputetëve për rrëzimin e Metës.

Në kërkesën për shkarkim thuhet se nisma vjen me qëllim të sigurimit të besueshmërisë së popullit tek Institucioni i Presidentit, pasi që sipas tyre, Meta ka shkelur rëndë Kushtetutën, sidomos para, gjatë dhe pas fushatës zgjedhore.

Nëpërmjet një postimi në Facebook, Presidenti i Shqipërisë, Ilir Meta, ka reaguar ndaj këtyre zhvillimeve duke i quajtur “shashka”.

“Të përqëndrohemi në mbylljen e procesit zgjedhor. Asgjë nuk ka përfunduar! Të vazhdojë administrimi i çdo kontestimi dhe ankese deri në rinumërimin e votës së fundit. Detyrë e të gjithë subjekteve të ndjekin procesin deri në fund. Mos u merrni me “shashka”, por me hetimin e krimeve zgjedhore!”, ka shkruar Meta.

Në nenin 90 pika 2 të Kushtetutës së Shqipërisë, thuhet se presidenti shkarkohet në rast se shkel rëndë Kushtetutën apo kryen një krim të rëndë.

Edhe Arbëri 3 maj 2021 Partia Socialiste mbledh 47 nënshkrime për të shkarkuar Ilir Metën

“Presidenti i Republikës mund të shkarkohet për shkelje të rëndë të Kushtetutës dhe për kryerjen e një krimi të rëndë. Propozimi për shkarkimin e Presidentit në këto raste mund të bëhet nga jo më pak se një e katërta e anëtarëve të Kuvendit dhe duhet të mbështetet nga jo më pak se dy të tretat e të gjithë anëtarëve të tij”, thuhet në Kushtetutën e Shqipërisë.

Për shkarkimin e Metës, duhet të votojnë dy të tretat e deputetëve nga 140 sosh sa ka gjithsej Kuvendi.