150 mijë euro ia ka borxh Pallati i Rinisë, KEDS-it.
Si rrjedhojë, kjo korporatë, gjatë ditës së enjte, i ka lënë në terr këta konsumatorë dhe kjo, sipas zëdhënësit të KEDS-it, Viktor Buzhala, ka qenë paralajmërimi i fundit për shlyerjen e borxhit.
Në të kundërtën, thotë Buzhala, do të detyrohen që t’i shkyçin nga rrjeti elektrik, raporton KTV.
Buzhala ka shtuar se do të kenë një takim me udhëheqësit e Komunës së Prishtinës, për ta gjetur ndonjë zgjidhje dhe se beson që shumë shpejt do të gjenden mënyra për shlyerjen e borxhit.
Por, nënkryetari i Komunës së Prishtinës, Muhedin Nushi, ka thënë se tek në janar do të mund të flitet për shlyerje të këtij borxhi, pasi ende janë në fazë tranzicioni.
Edhe
Pallati i Rinisë dhe i Sporteve i është kthyer komunës së Prishtinës bashkë me borxhet
“Deri në janar nuk do të ketë ndërprerje të energjisë elektrike për Pallatin e Rinisë dhe Sporteve, kjo sipas një marrëveshjeje gojore në mes të Komunës dhe KEDS-it. Tek në janar do ta bëjmë shlyerjen e borxheve, jemi në fazë të tranzicionit që komunën nuk e lë të veprojë më tutje. Shpresojmë që KEDS-i ta mbajë premtimin”, ka thënë Nushi.
Pallati i Rinisë dhe Sporteve nuk ka obligime vetëm ndaj KEDS-it.
Rreth 200 mijë euro borxh i ka edhe ndaj Kompanisë Rajonale të Ujësjellësit “Prishtina”.
Zëdhënësja e kësaj kompanie, Arjeta Mjeku, ka thënë se nëse nuk ndërmarrin ndonjë hap konkret për shlyerjen e këtij borxhi, deri më 1 nëntor të këtij viti, do të detyrohen që t’i shkyçin nga sistemi i rrjetit të ujësjellësit e kanalizimit dhe, njëkohësisht, të ndërmarrin masa ligjore përmbarimore.
Edhe
Kolapsi financiar i Prishtinës, punëtorët mbesin pa paga e kompanitë hyjnë në borxhe
Ndryshe, Pallati i Rinisë dhe i Sporteve, nga muaji shtator, është kthyer në menaxhim të Komunës së Prishtinës.
Me zgjedhjen e aksionarëve, Pallati i Rinisë do të regjistrohet si ndërmarrje publike komunale.
