Presidentja e Kosovës, Vjosa Osmani, deklaroi se Kosova ka synim të anëtarësohet në Programin e Partneritetit për Paqe dhe në NATO dhe ky synim sipas saj, është në përputhje me konceptin strategjik të Aleancës veri-atlantike.
Osmani u takua të enjten në Prishtinë me zv.sekretarin e Përgjithshëm të NATO-s, Mircea Geoana, të cilit i shprehi mirënjohje për prezencën e NATO-s në Kosovë, thuhet në njoftimin e saj në Facebook.
“Në takim me zëvendëssekretarin e Përgjithshëm të NATO-s, Mircea Geoană ritheksova mirënjohjen e Kosovës për prezencën e vazhdueshme të NATO-s në Kosovë, si dhe për gatishmërinë për t'i mirëpritur vendet aspiruese të Ballkanit Perëndimor në NATO. Uniteti transatlantik është vendimtar për t’i mbrojtur vlerat e përbashkëta të paqes, demokracisë e lirisë si dhe për ta luftuar ndikimin keqdashës të Rusisë dhe satelitëve të saj”, shkroi Osmani.