Presidentja Vjosa Osmani, ka diskutuar me ambasadorë të huaj në Kosovë për procesin e anëtarësimit të Kosovës në Këshillin e Evropës, duke i falënderuar për mbështetje.
Zyra e Presidencës njoftoi se të enjten është zhvilluar takimi me ambasadorë nga Suedia, Austria, Holanda, Finlanda, Zvicra, Luksemburgu e Belgjike, duke potencuar se sipas Osmanit, anëtarësimi i Kosovës në KiE “është hap vendimtar drejt rritjes së efektivitetit për mbrojtje të të drejtave të njeriut”.
“Më tej, Presidentja Osmani nënvizoi rëndësinë e anëtarësimit të Kosovës në Këshillin e Evropës si një hap vendimtar drejt rritjes së efektivitetit të mbrojtjes së të drejtave të të gjithë qytetarëve tanë pa dallim, duke u dhënë atyre qasje në mekanizmat për të drejta të njeriut që i ofron kjo organizatë. Në takim u shkëmbyen mendime për rrjedhën e mëtejme të procesit të anëtarësimit të Kosovës në KiE, sikurse edhe sfidave dhe mundësive. Presidentja Osmani theksoi se mbështetja e këtyre shteteve për Kosovën është e rëndësishme edhe në fazën e fundit, në votimin që mund të mbahet në muajin maj, në Komitetin e Ministrave”, thuhet në komunikatë.
Osmani ka përmendur edhe përkushtimin e Kosovës për ruajtjen e vlerave dhe standardeve evropiane.
“Në këtë kontekst, Presidentja Osmani përsëriti përkushtimin e palëkundur të Kosovës për ruajtjen e vlerave dhe standardeve evropiane, duke theksuar progresin e bërë në forcimin e institucioneve demokratike, promovimin e sundimit të ligjit dhe mbrojtjen e të drejtave të njeriut. Përgjatë ditëve në vijim, presidentja do të takojë edhe përfaqësues të shteteve të tjera anëtare në Këshillin e Evropës”, thuhet tutje.
