Presidentja e Kosovës, Vjosa Osmani, i ka thënë shefit të politikës së jashtme të Bashkimit Evropian, Josep Borrell, që BE-ja duhet t’i gjykojë përpjekjet e Serbisë për tensionim e destabilizim në veri të Kosovës.
“Kosova ka përmbushur një aspekt ligjor duke zbatuar marrëveshjen e vitit 2011 dhe 2016 për targat. Përpjekjet për tensionim dhe destabilizim nga struktura ilegale të mbështetura nga Serbia duhet t`i gjykojë vetë BE-ja”, ka theksuar Osmani në takimin e së hënës në New York, me Josep Borrellin, në një darkë joformale bashkë me liderë të shteteve të rajonit.
Të hënën, Qeveria e Kosovës ka vendosur masën e reciprocitetit, duke mos lejuar qarkullimin e veturave me targa të Serbisë. Veturat me këto targa, në hyrje të Kosovës duhet të marrin targa të përkohshme, njësoj siç obligohen qytetarët e Kosovës me targa RKS t’i ndërrojnë ato kur futen në Serbi. Masa nxiti reagimin e serbëve që me vetura e kamionë kanë bllokuar qe tash e tre ditë rrugët në drejtim të pikave kufitare në Jarinjë e Bërnjak në veri. Policia e Kosovës me njësi të shtuara është duke qëndruar në këtë zonë.
Në takimin e krerëve të rajonit me Borrellin është diskutuar për situatën në rajon dhe raportet e Ballkanit me BE-në.
Osmani, sipas komunikatës nga Presidenca, ia ka kujtuar Borrellit se Kosova i ka përmbushur të gjitha kriteret për liberalizim vizash, e se tash i takon BE-së t’i përmbushë premtimet e veta ndaj Kosovës.
Sipas saj, “Kosova është palë konstruktive në procesin e dialogut me Serbinë, porse ky proces duhet të përfundojë me njohje të ndërsjellë në kufijtë aktualë dhe me rendin aktuale juridik”.
