Ngec regjistrimi i pasurisë komunale të Gjilanit

Qeverisja lokale e Gjilanit ka ngecur në regjistrimin e pasurive të komunës.

Raporti i Auditorit të Përgjithshëm ka evidentuar menaxhimin e dobët të regjistrave të pasurive, shkruan sot Koha Ditore.

Sipas tij, kjo mund të rezultojë në humbjen dhe përvetësimin e pasurive, si dhe vështirësimin e konfirmimit të ekzistencës së tyre.

Sipas të dhënave, vlera neto e pasurisë komunale kap shifrën 199 milionë e 228 mijë euro.

Ndërkaq qeverisja lokale edhe këtë vit nuk ka mundur që t’i regjistrojë në pasurinë e saj edhe dy shkolla të financuara nga Ministria e Arsimit, ngase ende nuk është transferuar pronësia tek komuna, por dhe nuk ka mundur të regjistrojë edhe disa pasuri të tjera.

Gjithashtu Auditori i Përgjithshëm ia kishte tërhequr vërejtjen Komunës edhe për mosimplementimin e sistemit të menaxhimit të pasurive i njohur si E-Pasuria, ku përmes këtij sistemi menaxhohen të gjitha pasuritë, siç janë asetet e materialet shpenzuese të komunës. (Artikullin e plotë mund ta lexoni në numrin e sotëm të Kohës Ditore)