Nënshkruhet marrëveshje në vlerë prej 2.5 milionë eurosh për digjitalizimin e legjislacionit

Kryetari i Kuvendit të Republikës së Kosovës, Kadri Veseli, ka pritur sot në takim ambasadorin e Norvegjisë nё Kosovё, Per Strand Sjaastad's, me të cilin ka nënshkruar marrëveshjen e bashkëpunimit për implementimin e projektit për digjitalizimin e legjislacionit dhe harmonizimin gjuhësor të tij, të financuar nga shteti norvegjez, në vlerë prej 2.5 milionë eurosh.

Siç njofton kumtesa, Veseli tha se me anё tё digjitalizimit tё legjislacionit, qytetarёt e Kosovёs, mediat, organizatat e shoqërisё civile, partitë politike, institucionet e ndryshme, do tё kenё qasje tё lehtё edhe tё menjёhershme tek ligjet e Kosovёs.

Veseli tha se ky projekt, i modelit “Lowdata”, si njëri nga modelet më tё avancuara tё digjitalizmit tё ligjeve, tё zbatuar me dekada tё tёra nё shtetin e Norvegjisë, shënon hapin e parë të E-Qeverisjes nё Kosovё.

Ai shtoi se nga sot, demokracia parlamentare e Kosovës është më afër trendeve bashkëkohore të legjislacionit dhe transparencës ndaj qytetarëve.Ambasadori norvegjez, Per Strand Sjaastad's, nga ana e tij, theksoi se financimi i këtij projekti është konfirmim i mbështetjes së shtetit që ai përfaqëson, për reformat në Kosovë.

“Ky projekt do të jetë një mekanizëm shumë i rëndësishëm dhe i përdorshëm për të gjithë ligjvënësit, për profesionistët ligjorë, si prokurorët dhe avokatët, si dhe të gjithë qytetarët e thjeshtë në këtë vend”, theksoi ambasadori Sjaastad's, duke shtuar se kontributi i Norvegjisë në këtë projekt do të jetë rreth 2.3 milionë euro.